SINLUNG HILLS COUNCIL: Sinlung Hills Council (SHC) a sorkar lailawk (Interim Council) tur chu tunkar tirlam hian hriattirna chhuah tum a ni a, Pu Lalthalien chu chief executive member a nih rin a ni.
Home department atanga thudawn danin hriattirna hi vawiin Thawhtanni emaw hian tihchhuah hman tum a ni a. Tun hnaia Mizoram Assembly in a pawm tak The Sinlung Hills Council Act, 2018 leh a rules-in a tih ang thlapa hriattirna hi chhuah tur a nih avangin June thla khan an chhuah hman ta lo niin an sawi a. May ni 31 khan tuna Sinlung Hills Development Council sorkar hun kha a tawp tawh a. Interim Council hi din thuai tum a ni.
HPC (D) leh Mizoram sorkarin April ni 2 a inremna thuthlung an ziah dan chuan SHC hian member 14 a nei ang a, 12 te chu mipui thlan niin member 2 chu sorkar ruat tur a ni a. Council sorkar khaipa ber tur chu chief executive member (CEM) niin a thawhpui tur Executive Member an awm ang a, chairman leh deputy chairman an awm bawk ang. Interim Council CEM atana ruat tura rin Pu Lalthalien hi inbiakna a HPC (D) palaite hotu, a hnu a political level a inbiaknaah pawh an thupuangtu kha a ni. - AIR News Aizawl
Post a Comment