May 2, 2017 ~ H.Zate, Hmar Rûn

Author
Pawl 12 kan zir kum a ni a. In chhungah chuan naupang anga awm siin pawnah erawh kan nula ve viau tawh a. Kan class ah pawh a chhe pawl ka lo ni bik lo nen ka luck ve khawp mai. Tleirawl tituai nalh leh luck lai tih takah bêmtu leh heltu pawh ka ngah ve khawp mai. Chung zinga ka mit la ve em em tu, Puia chu chhangin kan ni ve ta a. In chhungah inrimin kan la inhmu ngam chiah lova, sikul kal leh haw lamah te kan inhmu țhin a. Nuam kan ti ve hle țhin. Ka ngainaa, a ni pawhin min ngainain min duh hlein ka hria a. Min fakin min chhuan thu a sawi luam țhin.




Ka pian a nalhin, ka lo chhe zek zawk bik lo bawk a. Puanfen chhing tai a ka han feng chu mipa ho mit a lain min en duh țhin ngei mai. Hmuhnawm ti takin min en țhin a, Puia pawh a bang bik lo.

Chance ka  neih hmasak ber chuan nuam kan tih rualin kan lai chhe dun khawp mai a. Inhnaih pawh kan inhnaih țha ngam lo a ni ber e. Min fawp dawn emaw ka ti a, mahse, ka kutah a vuan a. Kan inthlah ta rih a. A tukah kan inhmu leh a, chumi ni chuan min fawp a, ka chhang let ve a. Nuam kan ti dun ngei mai. Chuti chuan, kan inkawp rei telh telh a, kan thleng thui tual tual a ni ber mai.

Chutia kan inngaihzawn ațang chuan sikul kal chu nuam kan ti dun em em a. Sikul kal lo mawlh hi kan hlau a ni ber e. Ni tina kan inhmu theihna ber a ni a. Nuam kan ti em em mai a ni. Zing tin leh tlai tin kan kal kalin kan haw dun a, kan hlim hle țhin.

Mahse, chu ringawt chu kan inthlakhlelna hian a duhtawk zo ta lo. Tuition kan la dun a, kan inhmuh theihna tur a nih dawn avangin tuition chu hmun khatah kan la dun ta ringawt a. Kan hlimin nuam kan ti țhin hle a ni. Zana kan haw lam te hi kan in thlen hma thleng te min thlahin nuam kan ti ve țhin hle.
Chutia hlim taka kan awm lai chuan ka nu leh pain kan inngaizawng tih hriain min hau nasa khawp mai a. Ka pa phei chuan a phal lo leh zual. Tuition lak chu sawi loh zana ka chhuah hrim hrim a phal ta lo bur a. Tlai lamah nise, sikul kan ban hun leh in ka thlen hun a inmil tur a ni a, darkar chanve bak kawngah ka thang tur ani lo tih chu thupek   ni tawp tawh mai.

Inhmuh erawh kan țhulh chuang si lo. Inhmuh dan tur phet kan ngaihtuah a. Nu leh pate kha kan tan hmelma ang deuh khan kan ngaia, an hriat lohin thil tam tak kan ngaihtuahin kan ruahman a.  Inthlahlel leh inngai na na na chu inhmuh hlan mawlh kan nghakhlel a. Inhmuh dan tur kan ruahman leh a, țhiante nena zing tlan kan rawt a. Zingah min sawmtu chu kan țhian hmeichhia te an ni. Mahse, kan in ațanga a hlat chinah chuan Puia nen kan inkawp chawt a. Zing hma tak taka tlan chu kan tan chance neihna a ni a, kan duh thawh thei hle.   Chhungte’n min hmuh loh kar hun tawite chu duhthawh taka hmangin thil tam tak kan thlen tir ta țhin a ni. Inkhawm, birthday lawm leh inhmuh theihna zawng zawng chu inhmuhnan kan hmang a ni ber e.




Mahse, mahse, chutia nuam ti taka kan awm lai chuan, kan thil tih țha lo vangin kan buai ta. Ina naute anga la awm kha a ruk chuan nupa thil tih tur ang kan lo ti der tawh si. Barbie khal zo hlim hian pawnah chuan a barbie tu tur kan zawng a, mipaho lah, nu hnute hnek an ban chauh a hnute dang da tur an zawng leh a. Chuti anga nun, mahni nuam tih zawnga hmang a, nu leh pa hriat loha kan lo puitlin viauna chuan rah țha lo a rawn chhuah a. A tawpah chuan, nu leh pain min rem thei si lova, Naupang tein fa ka pawm a, nula hmelțha leh duhawm ni tur kha tunah chuan nuthlawi fa pawm mai ka ni ta si!

Nu leh paten min hmangaihna leh min zilhna te kha lo pawmin lo zawm chu ni ila, tunah hian nula hleitling, mipate thlir rawn leh nulate thik rawn ka ni ngei awm si a; Mahse, ka kawng zawh tur ka thlang sual a, Nuthlawi fa pawm,tlangval hawklakin an zuamah ka inchhuah ta a. Ka tana țha tur nia ka lo ngaih, ka tleirawl rilru duh zawngte kha ka tan a  țha si lo, A pawi takzet a ni!

02 May 2017 | Thingdawl




Post a Comment

Powered by Blogger.