Hmarchhak state pariat - Manipur, Sikkim, Nagaland, Mizoram, Aruanchal Pardesh, Assam leh Tripura-ahte Nilaini khan International Yoga Day lawm a ni. 
Assam-ah chuan Yoga Day lawmna hi Chief Minister Sarbananda Sonowal chuan a hmanpui a, taksa sawi zawi pawimawhna te a sawi. Sonowal chuan, mihringte hriselna turin taksa zawizawi hi a pawimawh em me a, Yoga chu naupang ṭanga puitling thlenga uar deuh deuh turin a sawm. Yoga chu school, office leh hmun dang dangahte uar zawka kalpui turin hma lak a nih thu a sawi. Lawmna hun hmanpuitu Finance minister Himanta Biswa Sarma chuan block hrang hrangah Yoga training centre 100 din turin state sorkar chuan hma a la mek tih a sawi ve bawk. 
Arunachal Pradesh-ah chuan Rajiv Gandhi Stadium, Naharlagun-ah Indo Tibetan Border Police (ITBP)-te buatsaih lawmna hun hman a ni a, mi sang khat vel an pungkhawm a ni. He hun hi Governor P B Acharya chuan a hmanpui a, Yoga ṭangkaina leh mihring hriselna atana a pawimawhna hrang hrangte a tarlang a ni. Tripura-a Yoga Day lawmna chu Union Minister pahnih - Faggan Singh Kulaste leh Babul Supriyo-te’n an hmanpui. Tripura-ah hian zirlai 50,000 vel zet chu hmun hrang hranga Yoga camp-ah an inziaklut a, state sorkar chuan nasa zawka kalpui turin ruahmnanna a siam mek bawk. Union Minister of Skill Development & Entrepreneurship, Rajiv Pratap Rudy pawhin Nagaland-ah he ni lawmna hi a hmanpui bawk.
Yoga Day hi Mizoram-ah pawh a lawmna hun buatsaih a ni a, Governor Lt. General (Retd) Nirbhay Sharma chuan Lammual-a lawmna hun hi a hmanpui a ni. Governor Sharma chuan Yoga chu sakhaw rinna nena inkalh a nih loh thu leh, taksa hriselna atana a pawimawh thu a sawi. Manipur-ah chuan lawmna hun hi Khuman Lampak Main Indoor Stadium-ah neih a ni a, Union Minister Prakash Javadekar leh Chief Minister N Biren Singh-te’n an hmanpui a ni. 
Sikkim chu International Yoga Day vawi thumna lawm tur hian nasa takin a inbuatsaih a, state sorkar chuan lawmna hun hi Stadium, Gangtok-ah a butsaih a ni. Union Minister of State for Home Affairs Kiren Rijiju, Governor Shriniwas Patil, Chief Minister Pawan Chamling leh sorkar mipawimawh en emaw zatin an hmanpui a ni. School, ITBP, SSB, NCC, Sikkim Police, leh pawl hrang hrang - Brahmakumaris, Sant Nirankari Mission, Healthy Self, Marwari Yuva Manch leh Patanjali Yog Pith-te an tel bawk. 
Union Minister Kiren Rijiju chuan, Yoga chu chawi lara uar zawka kalpui zel a pawimawh thu sawiin, hriselna atana thil pawimawh an nih avangin mitin tan a pawimawh a ni, a ti. Rijiju chuan Sikkim sorkar chu India rama state dangte pawhin an entawn mek a nih thu a sawi a, a hmalakna leh a hnathawh ṭhat chuan sorkar laipui beng a thleng tih a sawi. Tourism and Hospitality, Floriculture, Human Resource Development leh kawng hrang hranga a hmalakna te chu chhuanawm a tih thu sawiin, a bik takin tourism lama an hmasawna chu ropui a tih thu a sawi. 
Rijiju chuan Chief Minister Pawan Chamling-a kaihhruai sorkar chu mipuite tan thlamuanna tham a ni tih sawiin, hmasawnna kawnga a hnathawh te chu mipuiten an chhawr
ṭangkai mek a ni, a ti. Sikkim-in leilung hausakna leh mawina a neih te chu ṭangkai taka hman a nih avangin nasa takin state-in hma a sawnpui tih a sawi bawk. Chief minister Chamling pawhin Prime Minister Narendra Modi-a kaihhruai sorkarin hmarchhak hmasawnna a ngai pawimawh chu lawmawm a tih thu sawiin, hmarchhakin hma a sawn mek zel a ni, a ti. 
United Nations (UN) chuan June 21 chu International Yoga Day-ah a lo puang tawh a, India ramah pawh he ni hi lawm niin, sorkar laipui hmalknain kum 2015 ṭang khan ram chhung hmun hrang hrangah urhsun zawka hman chhoh a ni.

#Vanglaini

Post a Comment

Powered by Blogger.