Mizoram PWD chuan thuchhuah siamin, Seling leh Champhai inkar kawng chungchang an sawifiah. Seling-Champhai kawng chu March 4, 2014-ah National Highway-a puan ni mah se, Mizoram PWD-in an kut hlan turin a enkawl mektu Border Roads Organisation (BRO) an ngen chungin, March 31, 2017-ah an hlan chauh niin an tarlang.
PWD chuan, Seling-Champhai kawng chu March 4, 2014-ah NH-a puan a nih hnuah, February 17, 2015-ah Mizoram sorkar kuta awm tura tih a ni a, mahse, PWD kutah BRO-in an hlan nghal lo tih an tarlang a, "BRO hnenah PWD-in hlan tura a ngen pawhin, anmahni lamah remchan lohna vangin March 31, 2017 khan state PWD kutah an hlan chauh a; hlan tlai a nih chhan hi BRO hriat chi a ni a, state PWD chuan a chhan a hre lo," an ti.
Seling-Champhai kawng chu state PWD kuta la awm tur tho a nih avangin BRO-in la hlan lo mah se, PWD chu an lo inhmakhua tih sawiin PWD chuan, "Kum 2015 aṭangin Seling-Keifang leh Kawlkulh-Khawzawl inkar siamna tur estimate Central-ah thehlut lâwkin, tender pawh koh lâwk a ni," an ti a; Keifang-Kawlkulh leh Khawzawl-Champhai erawh chu kum 2015-a sum awmin a daih loh avangin tuna kum kal mekah estimate siamin Central-ah thehluh mek niin an sawi.Mizoram PWD tarlan danin, Seling-Keifang leh Kawlkulh-Khawzawl chu siam thuai a ṭul avangin BRO-in an hlan hma leh sanction pawh hmuh a nih hmain December 2015 tìrah tender chhuah lâwk a ni. Tender reng reng state chhunga tihfel mai theih a ni lo a, Ministry of Road Transport & Highways (MoRTH)-ah rei tak a thang ṭhin avangin a fel mai thei lo a; vawi eng emaw zat ûm zui hnuah Seling-Keifang atan September 2016-ah contract pek a ni. Kawlkulh-Khawzawl chu chhangtu tling hmuh loh vangin July 2016-ah tender nawn leh a ni a; MoRTH-in an tihfel har avangin Feb. 2017-ah contract tihfel a ni.
Seling-Keifang chu ṭhál chhungin thawh nghal a ni a, km. 13 chuang zawh hman a ni. Fûr a nat hma avangin zawh hman a ni lo a, ṭhal lo awm leh turah zawh beisei a ni. Kawlkulh-Khawzawl chu agreement sign hnuah contractor a inbuatsaih laiin kumin March aṭanga fûr a inṭan avangin awmze neiin hna an thawk hman lo.
Seling-Keifang kawng siamna atana sum hmuh (sanction) zat chu cheng nuai 1665.67 a ni a, December 29, 2015-ah sanction a ni. Kawlkulh-Khawzawl kawng atana sanction amount chu nuai 1595.71 a ni a, sanction ni December 29, 2015 a ni. PWD chuan, "State sorkar hian kawng hi neitu chan changin BRO kuta a awm lai pawhin a lo inhmakhua lâwk a, a mawhphurhna tur a ni tih hriain ruahmanna fel tak a lo siam lâwk a ni," an ti.
Source: Vanglaini
Post a Comment