LUNGLEI CHANCHINTHAR: Music Domain Mizoram (MDM) chuan hranghlui zaithiam, a hunlaia Zoram mai pawh nilo, Zoram pawn Mizo awm tawh phawtna a lar em em mai T. Lalengzauva hnenah rimawia a sulhnu ropui tak avanga chawimawina 'Lifetime Achievement Award' an hlan dawn.
Naktuk zan dar 7 atanga Lunglei Home TNT, Theiriata neih tur Circle of Music Charity Concert neih turah he chawimawina hi hlan a ni dawn a. He hunah hian zaithiam lar tak tak an fuankhawm dawn a ni.
UPA T. LALENGZAUVA CHANCHIN
Upa T. Lalengzauva hi Nov 7, 1956 khan Leite ah Pu Tlangzika leh Pi Hrangzemi te inkarah a piang a, An unau hi 7 niin, mipa 3 leh hmeichhia 4 an ni. Kum 1967 ah Leite atangin Hnahthialah an insawn a. Kum 1973 ah Leite-ah bawk an kir leh a, 1981 ah Lungleiah pem lehin, tun thlengin Farm Veng, Lungleiah an la cheng.
Kum 1977 atangin Evangelist F. Laltuaia rawngbawlna a zui thin a, Soloist atan a hmang thin. Kum 1979 November thlaah AIR Aizawlah Voice test a nei ve a, 1980 January thlaah hla a record tan a. Hemi kum vek hian Otto Recording Studio-ah Cassette a siam chho tan bawk a, chuta tanga a hla sak lar chhoh, 'Thuro angin ka thlawk ang’ tih hla atang chuan mite’n an hre lar ta hle mai a.
Fakna hla lam hlir a thlur chho va, tunah chuan hla 100 bawr vel Radio-ah a record tawh. A hla sak lar thin zingah, ‘An dang chuang lo ve’ tih hla te, ‘Muanga kan rin angin Lalpa chu a muang lo’ tih hla te, ‘Lalpa thu sawi rawh ka bawih a dam ang’ tihte leh ‘Kalvari Kraws ka thuam famkim’ tihte hi 1980 chho velah a lar hle a. A hlapui ber ti mai ila, ‘Thuro angin ka thlawk ang’ tih hla hi 1983 chho vel hi a lar vanglai deuh a ni awm e.
T. Lalengzauva hi BCM hnuaiah kohhran upa niin BCM Recognised team 'Revival Team' speaker a ni a, tunah hian Bualpui NG ah rawngbawlna nei turin an kal mek a ni
Cassette (album) pawh 1980-2000 inkarah hengte hi a siam tawh a:
1. AN DANG CHUANG LO VE.
2. BETHLEHEM ARSI (Krismas Hla)
3. KA ZAI ANG LALPA FAKIN.
4. BUAINA RAL A LIAN E.
5. THURO ANGIN KA THLAWK ANG.
6. FAK R’U IMMANUELA.
7. KRAWS CHAUH ENIN.
8. CHATUAN LALRAM.
9. EDEN THAR.
10. VAN MALSAWMNA
Lalpa’n a hmang hle a. Hla pawh 10 vel chu a phuah tawh. A hla phuah zinga thenkhatte chu:
1. Krista Isuaa awmte ten thiam loh channa a awm lo-1976
2. Muanga kan rin angin Lalpa a muang lo - 1980
3. Kristaah zalen ka ni - 1980
4. Lal Isua pan rawh - 1983
5. Tangka leh Rangkachaka tlan kan ni lo-1986
6. Ka inhumhimna kulhpui - 2004
7. Thlarau Thianghlim ka zirtirtu - 2007
A zai hi Radio-ah hla thlan hun luah tam pawl tak a ni a. Tangka leh rangkachaka tlan kan ni lo tih phei chu, Pathianin a hmang hle a, hla tha leh rau tak a ni.
Post a Comment