Vawiin khan a tum khat nan Lawngtlaiah chhiat rupna thlen thulha chet lak dan tur en chhinna (mega mock drill) buatsaih a ni.
He mega mock drill hi Lawngtlai District Disaster Management Authority (DDMA) bul tuma District Disaster Management Committee (DDMC)-in a rel anga buatsaih a ni a. Hemi atan hian National Disaster Response Force (NDRF) 1st Battalion, Guwahati atangin Assistant Commander Santosh Kumar Singh hovin team member 35 an lo kal a. State Disaster Mangement Authority atangin mock drill kalpui dan en thlithlai turin observer pahnih an lo kal bawk.
Zing dar 10-ah Lawngtlai DC office-ah chhiatna thlen hriattirna (disaster siren) tihrik niin, mega mock drill hi tan a ni a. Lirnghingin Lawngtlai khawpuiah chhiatna a thlen anga tih chhin niin, chhiatna tenau hmun hrang hranga thleng karah Lawngtlai DC office leh District Hospital te chu chhiatna thlenna pui ber anga lantirin, in chim leh kangmei chhuak kara chhanchhuah hna thawh dan leh thil tih dan tur a taka chan chhin a ni. Chhiatna thlen veleha mipui insaseng dan tur te, chhiatna thleng chungchang thuneitute hnena hriattir thuai dan tur te, a bul hnaia awm khawtlanga tlawmngai pawlte’n chhanchhuah hna an thawh nghal dan tur te, police lamin motor tlan dan an thunun a, chhiatna thlenna hmun an ven dan tur te, kangthelhtute leh line department hrang hrangin an mawhphurhna an hlen dan tur te, hliam tuarte’n damdawia enkawlna an dawn thuai theih nana medical team-in an tih tur leh damlo enkawl hmasak ngai leh na vak lote thliar dan tur te, damdawi ina phurh dan tur leh chhanchhuaktu pawl lian zawk NDRF te hmanraw chi kim nen an lo thlen huna an chet lak dan tur te chipchiar taka entir a ni.
He mega mock drill-ah hian District Administration, District Health Department, Police Department, Fire & Emergency Services leh state department hrang hrang bakah, World Vision India leh an hnuaia volunteer-te, Adventure Club leh YLA member te’n a tak ang thei ber turin chhiatna thleng lem an chang a. Mahni mawhphurhna tur theuhte a tha thei ang bera hlen chhuak turin theih tawp an chhuah hlawm a ni.
Mega mock drill neih zawh a nih hnu hian Lawngtlai DC Conference Hall-ah debriefing neih chhunzawm nghal a ni a. He hun hi Lawngtlai Addl DC Pu H. Dolianbuaia MCS chuan kaihruaiin, observer-te hnen atangin mock drill kalpui dan an lo thlithlai atanga an thil chhinchhiah te leh hmasawnna tura rawtna an neihte ngaihthlak a ni a. DM&R Nodal Officer Pu Lalrinawma MCS leh NDRF Asst Commandant Santosh Kumar Singh te bakah, site incident commander-te leh member dangte hnen atangin mega mock drill an hmuh dan leh rawtna hrang hrangte ngaihthlak a ni bawk.
Debriefing neih zawh hian DC office tualah NDRF lamin an hmanraw neihte pho chhuakin, a tangkaina leh a hman dan te an entir nghal a. Chumi hnuah Don Bosco School-ah school awareness programme buatsaih leh niin, he hunah hian NDRF lamin chhiatna leh rikrum thil a lo thlena chet lak dan tur leh awlsam taka mahni chhehvela thil awmte hman tangkai dan tur a takin an entir a ni. -DIPR Mizoram
Post a Comment