Mizoram Football Association hnuaia khelh 13th Inter District Sub Junior Football Championship semifinal chu Champhai DFA kaihhruaina hnuaiah nimin khan Chhangphut Field-ah khelh zawh a ni a, Kolasib leh Aizawl-in an khingpui ve ve hnehin final an lut.
Kolasib-in semifinal-ah meuh pawh an goal khung thiam an ṭhulh lo a, Lunglei chu 5-1 ngawtin an sawp. Kolasib tan hian an player chhuanvawr Lalthangliana chuan hattrick a siam a, Vanlalhruaia leh Isak Malsawmkima ten goal khat ve ve an thawh bawk.
Kum 14 hnuailam inelnaah hian Kolasib-in semifinal khelh hma thleng hian goal 17 ngawt an khung a, goal chhuah an nei lo - nimina semifinal inkhelah pawh goal nga ngawt khung leh mah se tun inelnaa a vawi khat nan goal an chhuah a, goal nga an khung hnuah Kolasib lama goal khung thei awmchhun ni turin Lunglei tan Joseph Lalmuanawma chuan goal khat a khung a ni - Joseph hian a goal hnihna khung turin penalty-in hun ṭha dang nei leh mah se a hlah thung.
Lalthangliana leh Joseph Lalmuanawma ten goal riat ve ve khung tawhin joint top scorer an ni mek a, Kolasib rawlthar Lalthangliana'n match khat khelh tur a la neih avangin tun inelnaa goal khung hnem ber ni turin a dinhmun a ṭha zawk.
Semifinal hnuhnung zawkah Aizawl-in a thlengtu Champhai lakah mikhual tlangnel zia an chhuah a, 2-1 in hnehna an chang. Mikhual team hian minute hnihna lekah Caleb Lalnunhlua hmangin goal hmahruai an khung a, minute 30-naah Lalhmunmawia'n an goal hnihna a khung ve leh bawk.
Chawlhlawk hman a nih hnuah thawh ngei tumin Champhai lamin theihtawp chhuah mah se minute 59-naa C. Ngurnuntluanga'n an si phurh a sut ṭhen hnuah goal dang khung thei an awm lo a, 2-1 in Champhai an tlawm.
Mizoram Football Association
Final hi Ninganiah khelh tur a ni dawn a, chawhnu dar 1:00-ah Kolasib leh Aizawl an inkhel ang. -Vanglaini
Post a Comment