Red Kettle Service hi December 8 khian Millennium Centre kawtah KS.Thanga, Minister of State chuan Kick Off-na a nei ang. Kick Off programme hi Lieut-Colonel Zothanmawia, Secretary for Programme Administration chuan a kaihruai dawn a, Territorial Staff Songsters, Central North Division Songsters leh Central South Division Songsters an zai ang. Anni bakah hian mimal zaithiam Esther Lalrinhlui leh H.Vanlalhlimpuii te an zai bawk ang.
December 9 leh 16 zing karah veng hrang hranga hmun lun laiah Red Kettle Service hi kalpui a ni ang a, Corps hrang hranga Band-te'n hun an hmang ang. December 12-ah Bara Bazar, High Mast bulah neih leh a ni bawk ang. Red Kettle Service hi mi harsa leh chanhai zawkten hlim leh lawm taka Krismas an hman ve theihna tura bawm dawhsakna a ni a, kum dangah pawh kalpui a lo ni tawh ṭhin. Aizawl khawpui chhung hmun hrang hrangah service hi kalpui ṭhin niin, band leh mimal zaithianten hun an hmang ṭhin. Mi tlawmngai leh thilpek pe duhten he service kaltlang hian mi harsate pualin luanchhuahna an nei ṭhin a, sum tling khawmte hi ṭanpui ngaite hnenah hlan leh ṭhin a ni.
Red Kettle Service hi Salvation Army rawngbawlna pawimawh tak pakhat a ni. -Vanglaini
Post a Comment