Winter Festival hmasa ber, Tourism department buatsaiha November 23, 2017-a Tuirial Airfield-a ṭan chu ni thum chhung neih a ni a, November 25, Inrinni khan khâr niin, a khârnaah hian Tourism minister John Rotluangliana khuallian a ni.
Tourism Minister chuan, kum hmasa lama Tourism department-in kût a buatsaih ṭhin, Anthurium Festival leh Ṭhálfavâng Kûtte chu tihtawp a ni a, a aiah Winter Festival hman ṭhin a nih tawh dawn thu a sawi a; Winter Festival chu Mizote tan chauh ni loin, ram hrang hrang aṭanga khualzinte hîpna tur a nih thu sawiin, nuam tâwlna ni loin, thawhrimna aṭanga hahchawlhna hun hlimawm a nih thu a sawi bawk.
Tourism secretary Sangdingliana sawi danin, Tourism department hian khualzinte tlawh theih turin Thenzawlah golf course leh Chaltlang-Durtlang inkarah cable car siam hna thawh mek a ni a, Rural home-stay program kalpui mek a nih bakah, Sakawrhmuituai tlangah skywalk siam tum a ni.
Winter Festival hi sorkar laipuia Ministry of Tourism, DoNER leh North Eastern Council (NEC) aṭanga sum hmuh hmanga buatsaih a ni a; ni thum hman chhungin intihhlimna chi hrang hrang a awm bakah, hnam làm leh zaite entir a ni.
Post a Comment