 |
| Representational |
Aizawl: Mizoram State Aids Control Society (MSACS) chhinchhiahna hnuhnung ber March 2017 thleng khan Mizoramah HIV positive 14632 an awm tawh a, mipat hmeichhiatna hmanga kai an tam berin tun lai hian drugs hluar tharin district pahnih ah chuan mipat hmeichhiatna aiin damdawi hman khawloh avanga kai an tam zawk niin MSACS hotute chuan an sawi.
Thudawn danin Integrated Counselling and Testing Centre (ICTC) ah hian kum 1990 atang March 2017 thleng khan thisen mi 605,119 test sak an ni tawh a. Heng zinga mi 14632 chu HIV positive niin hei hi za zelah 2.42 a ni.
HIV AIDS inkaichhawn chhan tam ber hi mipat hmeichhiatna hman atangin a ni a, hei hi zaa 67 vel a ni. Inchiuna hriau in hman tawm avanga kaiin an dawt leh a, hei hi zaa 25 vel niin nu atanga nautein a kai hi zaa 3 vel a ni a, a bak zaa 2 vel hi kaina chhan tarlan a ni lo.
MSACS Project Director Dr. Lalmalsawmi Sailo chuan State AIDS Control Society ten National AIDS Control programme angin NACO kaihhruaina zulzuiin hna an thawk niin Zalen a hrilh a. Hetah hian HIV kai hlauhawm a awm mek ‘high risk group’ nasa taka thlurbing an ni a; nimahsela, Mizoramah ve thung chuan sex avanga a darh nasat avangin mi zawng zawngin do a tul niin a sawi bawk.
Dr. Lalmalsawmi Sailo chuan HIV AIDS chu society pakhat emaw pawl pakhatin an do hneh theih a ni lo a sawi a. Sex avanga mipui mimira a darh bakah tun kum hnih thum kalta atang khan Mizoramah drug a lo luh nasat thu leh, heng drugs te hi a tlawm thu sawiin HIV nasa taka a tihdarh mek thu leh district pahnihah phei chuan HIV kaichhawnna tam ber chu damdawi hman khawloh a nih thu a sawi.
Mizorama HIV positive te hian enkawlna an dawng zel a, ART la tura ruahhman mi 10531 an awm a, la thar mi 7067 awmin la mek tawh mi 5027 an awm bawk.
Mizorama HIV positive zingah hian kum 25-34 inkar an tam ber a, zaa 42.45 an ni. Kum 35-49 inkarin an dawt a, zaa 26.98 a ni a. Kum 14 hnuai lam tlem berin zaa 3.64 a ni.
December ni khat ah hian World AIDS Day hman a ni leh dawn a. Kuminah hian thupuiah “Increasing Impact through Transparency, Accountability, and Partnerships” tih a ni dawn a. Langtlang, rintlak leh inzawmna tha tak hmanga hnathawh chu kum 2017 World AIDS Day in a tum ber a ni. -Zalen
Post a Comment