Rualthankhuma Chhakchhuak hi October ni 13, 1960 khan Lakhipur Assam- ah a piang a. A pa chu Pu C. Rokhuma a ni a, a nu chu Sapliankimi a ni. An unau hi 5 an ni a, mipa 4 leh hmeichia 1 an ni. Kum 1985 October ni 25 khan Lalthangkimi Pachuau nen an innei.
 |
| Rualthankhuma Chhakchhuak & Zorinzuali Khiangte |
Rimawi khawvel lama a hming a larna a rei tawh hle a. Zirna lamah P.U. thleng a kal a. Amah hi zai thiam leh hla phuah thiam a ni a, All India Radio Aizawl Station-ah Grade ‘A’ Artist zinga tel a ni. A nu leh pa hnathawhna avangin a naupang a nih chhung chu Assam leh Meghahlaya State-ah te an khawsa a. Kum 1985 khan Aizawlah awmhmun an bengbel ve ta a ni. Naupangte a nih lai atanga zai leh rimawi ngaina tak a ni a. Mi tam zawk hriata a rawn zai lar tak erawh chu kum 1980 atang khan a ni.
Zoram an rawn chhuah hnu hian Music leh zai zirna School a hawng ta a. A hmingah ‘EMILY SINGING INSTITUTE’ a vuah a, amah a tui bawk a, thalai tam takin an bawh a. Zofate zai leh rimawi lama kan tlakchhamna a hrechiang hle a, hei hian nasa takin hma a tisawn a ni.
Kum 1988 khan Audio Album ‘Remna Lal’ tih chu a siam a, ama hla phuahte a sa hlawm nghe nghe. A hla sak zingah ‘Vanglai ni’ tih chu a mawiin mite duh ber zinga mi a ni.
A larpui zingah chuan Zoram, lungphang suh (ram hmangaihna hla) te, Vanglaini (thian ngaih hla) te, Kan duai lo (Mizo blues) Zofate chona hla te an ni a, hengte hi ama phuahte an ni.
Hla hi 50 lai a phuah tawh a, 1980 atangin Radio ah hla a record tan a, tunah (2011) hian 48 vel zet a record tawh. Hnam inpumkhatna hla Unity thro’ Culture a phuah phei chu Mizoram mai pawh ni lo, State dangah te pawh a larin, English-a letin, kum 1998 ah phei kha chuan Vanapa Hall a Official function-ah a sa a, chumi tuma a hla sak thlirtu leh ngaithlatu mipuite rilru leh thinlung chu a hneh em em mai a. A ngaithlatute chu ram hruaitute leh Sorkar officer liante an ni a, thiam an tiin an ngawi thuap mai a ni. Amah a zaithiamin a aw hi a zo aw phawi fuh hle a, mite ngaihsan a hlawh hle. ‘Remna Lal’ tih hla a cassette-a a sak chu a larpui ta deuh ber a ni. Tunah Chanmari Aizawlah an cheng. -Lalremruata Ralte
Post a Comment