rahul gandhi congress president tharCongress Party President thar atan Rahul Gandhi puan a ni ta a, December 16-ah charge a la ang. 

Nimin chawhnu kha party senior leader Mullappally Ramachandran chuan party hruaitu thar atan Rahul Gandhi thlan a nih thu hi a puang a ni. Ramachandran chuan party president thlanna neih turah president atana Rahul Gandhi rawtna, nomination proposal 89 thehlut niin, hengte hi pawm vek a nih thu a sawi. President thlanna neih turah hian Rahul Gandhi chu candidate awmchhun a ni a, hei vang hian India National Congress President thar atan Rahul Gandhi chu chuhtu awm loa a tlin thu a puang ta a ni. 

November 20-a Congress Working Committee meeting chuan party president-a Rahul Gandhi dah tur hian resolution an lo siam tawh a ni. He meeting-ah hian Sonia Gandhi, Rahul, Manmohan Singh bakah party hruaitu hlun Mallikarjun Kharge leh Ahmed Patel te pawh an tel. 

Kum 2013 January thlaa Congress vice president a dah, Rahul Gandhi hian a nu, Sonia Gandhi thlakin party president thar a ni dawn ta a ni. Sonia Gandhi hi party president dinhmun chelh rei ber niin, kum 1997 aṭang khan a lo chelh tawh a ni. 

Rahul Gandhi hi independence hnua Indian National Congress president 16-na tur a ni a, an chhungkaw member zingah party hruaitu lu ber dinhmun chelh thei parukna a ni ang. Kum 47 mi, Gandhi hian a thlahtu, Motilal Nehru, Jawaharlal Nehru, Indira Gandhi leh Rajiv Gandhi-te hnung zuiin party president a ni dawn ta a ni. -Vanglaini

Post a Comment

Powered by Blogger.