PU PC ZORAM SANGLIANA’N KOLASIB SAIDAN BRANCH YMA SILVER JUBILEE HMANPUI

Kolasib Saidan Branch YMA Silver Jubilee chu vawiin khan Saidan Community Hall ah bialtu MLA Pu PC Zoram Sangliana’n a hmanpui.

Khuallian chuan thu sawiin YMA chu khawtlang nu leh pa, khawtlang mi te tana innghahna kulhpui an nih avangin YMA hruaitute leh member te chu mahni inpe zo taka khawtlang tana thawk zel turin a sawm a. Khawtlang leh ram tana rawngbawlna ah rinawm taka thawkin mizo nun ze mawi chawinung tu ni turin a chah bawk a ni. Tunlai khawvel hmasawn zel ah kan kalphung te chu khawtlang leh mipuite mamawh anga inherrem thiam a ngai a ni tiin kalphung pangai ringawt hi chu a tawk tawh loa kan hnam kalphung ti bo chuang si loin a tul anga kan inherrem a hun tawh a ni a ti. Khuallian chuan mahni tan mai bakah chhungkua leh midang tana thil tangkailo, hriselna a tana pawi si heng ruihhlo, zuk leh hmuam te chu bansan in ruihhlo sal tanna atanga chhuak turin kalkhawm te chu a chah a, YMA chu kan hnam ro innghahna tlak a nih chhunzawm zel theihnan YMA hruaitute leh member te chu theihtawp chhuah zel turin a sawm bawk a ni.

Jubille lungphun hi tukin dar 8:00 Am khan Sub-Hqrs YMA president Pu C.Liankunga’n a hawng a, hemi bakah hian bialtu MLA chuan MLA Fund cheng Nuai 3 senga sak Saidan Roadside Market chu a hawng bawk a ni.-DIPR