Rawna Fanai
PWD Tlang RVL
(Vawksa Street)
'
Kum 2006 January thla khan he thil hi a thleng a, Pawl pakhata ka tel ve lai ania (a pawl hming ka zep dawn, pawilo mahse, a zahthlak). Vanneih thlak takin kan pawl chu Shillong lama kan Mizo Unauten programme nei turin min rawn sawm ve mauh mai a, kan lawm tlangin, kan phur ngei mai. Kan programme leh item tur te pawh zirin kartluanin; inkhawm a awm e, awmlo e, inkhawm banah te banlohah te pawh kan zir tlauh tlauh mai a, hei hi a chhan pakhat chu hetiang programme ruahthramloh hmang tura sawmna kan dawn tlai em vang ania. Kar 2/1 awrh chauh tak tak inpuahchahna hun kan nei si a, tan loh theihloh a ni lo e.
'
Kan kal hma zan hian mang mak deuh mai, ka nau hmeichhia (kan milai) in a mang pek a, a mumangah chuan kan lo chesual a ni awm a, zingah ka chhungte leh keima bulah pawh a sawi a, an ngaih pawh a nuamlo rum rum tih pawh an hmel atang a lang thei a, keipawh ka rilru chu dam zan lo nangin, ka pa in, " eng in ti lo ang, mumang te chu chutia awih tlurh tur a ni ngailo", a tih avang leh, keimah hrim hrim pawh ka phur em avang chuan engah vak ka ngai duhlo lui a. Tichuan a hma, hma leh zana insiam zo at tawh kha ka nia, ka inpeih hma vet vawt ngei mai. Dar 9 a innghah khawm tur ania, City bus hire hmanga kal tur kan nih avangin 'tlai loh tur' tih pawn kan inchah ngun a, keichu ka tlai ka ring lo nasa, dar 7 a.m ah chuan in put chhuah tawp bak hmabak ka nei tawh lo.
'
Pathian hruaina in dam tluang te in Shillong chu kan thleng thla ta a. Thlen in tur te min kawh hmuh sang sang hnu chuan mahni thlenin lam panin kan kal darh ta sang sang a. Kan thlenna hi in nalh tak mai hi a ni a. Chhawng hnih, hmanlai sap ho sak ni mai awma mawi hi a ni roh a. Keini chu a chunglama hmun awlah chuan mu turin min ti a. Kan vaiin paruk kan nih avangin hnuai lamah pahnih an mu thung a. Hetah hian mak ka tih deuh, a hmuna ka sawi chhuah lemloh chu...an chhungkua kha an rual ve pangai viau si a. Inchung lam kha an luah tel reng reng lo a. An dah awl huai a. Luh chhoh phatah khan kawngka pathum hi hmuh tur a awm nghal a. A inkalh thrap hlawm lehnghal a. Kha kha mak ka ti ru mai mai na in, sawi chhuah hlut tlakah ka ngaih lemloh avangin ka ngawi ta kha a nia. Mahse awmzia a lo nei nasa mai ti ila ka uar lutuk lo turah ngai ang.
'
Kan mutna awmdan hi han sawi lawk ila, step kan chhuahchhoh chuan dinglama hawi chiahah hian kawngka a lo awm, ka han lut a, room pangai tiah zet tur hi a lo awl huau a, veilam pangah erawh chuan tukverh sang chi ang kha a awm a,pawnah chuan Balcony tha deuh zau vaklo hi a awm bawk a, kawngkhar dang awm lo in tukverh atanga chhuah thin chu niin a lang. Kan luh tirh a mak kan tih leh deuh chu, luh tirh zawnga kan hma zawna room awm inkalh ve tho ka tih, kawngkharah khan KROSS lian vaklo hi a lo intar a, kan thianpa pakhat chuan "Catholic an niang a", an ti ngawt a, mahse keini Presbyterian kan nia, an ni pawh min sawmtu an nih na angin an ni ve tih chu kan hai silo a, mahse engah vak kan ngai chhunzawm ta lo a, kan mutbu vel kan phah fel a. Zela leh tluanga chu an lo che rang deuh a ni, a piahlamah an pahnihin mutbu an pharh ta keuh mai a, Zuala bulah chuan ka mut a ngai dawn ta tlat mai, a room a lian si lo a, mutbu insi rial chuan kan mu a.
'
ZAN 1 NA :- (Thursday) : Kan thlenna veng biakinah chuan kan inkhawm a, mi lawmna hun leh lawmthu sawina te kan hmanga kan bang ve mai a, keini pawh chauh nen mut hma tumin thlenin lam kan pan nghal sang sang a. Khua a vawt tha bawk a, kekawr hnuaiah pyjama kan ha a, kamis hnuaiah high-neck kan ha vek bawk a, inphelh vak pawh ngailo, kan thleng phei chu kan mu fel a ni ta nghal mai a, Zuala in hnuai lama hotupa te mutna lamah te a zu leng thla a, chumi remchanga la chuan, lo mutthlih khalh hram hram ka tum a, mahse zela leh tluanga te khan ka tum an lo hria niang chu, ring em em silo hian ka hriat phak ngei tur chuan an han titi lui vak vak a, ka ngei dan kha aw. Zuala stepah a rawn pen chho thlup thlup a, ka rilru chuan "Huiha, zanin chu ka mu mai dawnlo tawp a nih hi" ka ti a, a rawn thleng chho chu a veikual turh turh a, a ha te a nawt phur phur a, a rawn mu a, reilo te chu a rawn tawng ve a, mahse a titi bawrh bawrh emaw kan tih reng lai chuan a ngawi ta vung vung a, a HELICOPTER chu an rawn start ta mai a. Rilru a hah duh asin, chauh ve nen, zing mut rei chi dawn bau siloh.
'
Ka khum ah chuan ka mu a, ka in lukhup a, amplifier hi ni ringawt, a ring telh telh emaw tih mai tur a ni. Ka thu chhuak hlol a, zela leh tluanga te pawh an titi melh melh emaw ka tih kha an lo muhil ve der tawh chu niin, phone ah sana kan en a, dar 11:11 P.M chiah hi alo nia, mak kan ti deuh hlut a, mahse ka bula tractor tlan chuan rilru a la leh vat a, tihdan tur ka ngaihtuah a, a vang ngei mai. Mahse bus a ka mut dan diklo nen, ka chau bawk aniang, ka lo muhil ve sek a. Darthlalang ri rawk hian mi rawn tiharh a, kawngka atanga luha veilamah, darthlalang sang chi a awm ka tih kha, (balcony chhuahna kha), tukverh chu lu lama dahin kan mutbu kan rem kha ania, ka lu chung chiaha ri a nih avangin ka hre chiang khawp mai, dar zat ka en a, dar 3:04 A.M hi lo ni a,mahse rilruah thlahrang tih vel kha a langlo hrim hrim bawk nen, rannung lian takin a rawn su dawt aniang ka tia, ka mu leh ta mai a, ka lo muhil ve leh mai bawk a. A tukah chuan nilengin hun nuam tak kan hmang a, then khat Silchar pawh la pello te an awm a, kan lengkual vel bawk a.
'
ZAN 2 NA (Friday) : A hma zana ka mut theih angreng viau avang chuan kan Van-lal-Hnar-nasa-em-em-a pawh chuan min tibuai vak dawn lo anih hi ka ti rilru a, ani lah chu a tawngtai a, ain lukhup ang bur lehnghal a, mutbu chu ka siam fel a, mutthilh chu ka tum chawpchilh nghal a. Mahse ka MY FRIEND a chu a tawngtai zo a, vawiin chu nuam ngei mai a tia, a phone a melh run run a, a dah a, a thle buk a, a muhil chu ni leh mai si a, a ngai te in ri leh nghal hem hem mai a, rual u zawk a ni bawk si, han sawi emaw, a lukham va siam a, han tih harh chhen kha nuam silo a, ka tuar tawp mai ani. Mahse sawi tawh ang khan, a hma zana ka mut theih em avang khan min tibuai vak dawnlo niin ka ring a, kan mu lui ve ta a, mahse kan zin hahna taksa chau te a lo reh tawh nen, a hma zan ang a ni thei ta hauhlo mai. Hemi zan hian kan haw tlai a, kan mut meuh chuan dar 1 A.M a lo ni der tawh a, midang ho chu an muhil kim thap tawh a, kei lah chu mut chu khawilam, YMA Information mike hmawra mu ang hlauh ka ni. A ring lutuk, a mut theih thlawt loh, a chang leh thil hak ang deuh te hian an awm a, ka va kang leh uk uk thin, mahse a hnar dan hrim hrim kha alo nia.
'
Chutia ka tih nek nek lai chuan dar 2 A.M alo ri reng tawh a, naktuk zing thawh hma ngai leh dawn sia (mutrei bik a nuamlo) kan mului dawn teng ka tia,ka mu ve ta a. Mahse mut pawh a chhuak tawh lo, ka meng kar mai a,kawngkhara an kraws tar chu ka en a, engatan chuan ti niang maw tia ka ngaihtuah lai chuan ka hnung parda inzar chu hlaihtu awm tih hriat tak hian a rawn thim zeuh ( thla eng a rawn hliah zeuh) mai a, ka hawi chho nghal a, mahse engmah ka hmulo a,mahse ka rilruah chuan Bak lian chi kan tih ang te pawh kha ni thei alawm, rawn thlawk ta se, a rawn hliah hlup thei em em ang ka ti rilru a, a thlang lam hi huan ania, balhla kung pawh 2-3 vel a awm a, chumi avang chuan ka hlau hranlo a, bak rawn thlawk a nih ka rin avang chuan aniang. Mahse hemi zan hian ka mu thei reng reng lo a, bengchheng chu thuhran nise, ka harh hra mai a,dar lah a kal duak duak a,ka maimitchhing lui a, eng ka ang lem lo a. Chutia darkar khat emaw khat leh a chanve vel emaw mutthilh tum ka beih vel lai chuan, zing dar 4 emaw 3:30 vel aniang, vei lampang zawka room awm,an khaina chhungah chuan pen ri (ti mai ang,a hnua ka ngaihtuah leh hian) ka hre ta a. Ka tehkhin ber chu bata slipper bun ila, inbual zawh a, kan kal ri tret tret ang hi ni mai in ka hria, mahse a rikna a insawn kual avang khan mak chu ka ti ngei mai. A rik kual rual chuan thaw hah hmel em em, thaw tha theilo ang hian a ri leh hruk thin bawk a. Mahse hlauh ena ka en tlatloh avang khan in hnuai lama mu te an zung anga, an ke tihuh in an kal aniang ka tia, a chang leh an ha an thrial aniang te ka tia, ka la hlau eih chuanglo.
'
ZAN 3 NA (Saturday) : Zanah kan inkhawm a, inkhawm banah chuan midang thenkhat chu an leng a,keichu Zuala lo haw hmaa mut ka duh avang leh, ahma zana ka mut chhiat em avangin mut hma ka duh a, ka haw daih a, ka tum ang ngei chuan ka lo muhil sek a, mahse thlenpuite rawn haw chuan thawm dim tange ti ta lo chuan min rawn tiharh leh pek a, ka thinrim kher asin o. Zuala lah chu a mu a, a bei nghal chu ni leh mai a....aw....huiham... hi ni ringawt. Midang ho zel zawl chu smile emoticon an muhil leh vek tawh a, keichu mut na chi hi a nilo, ka lam arawn hawi leh nghal a, tu fa lubawk mah hi an mulo ange. Ka zun chu a rawn chhuak trial trial a, zunin inhnuaiah daih a awm sia,a vawt bawk nen ka chhuk peihlo a, midang an mu vek tawh bawk a, tukverh chu hawngin balcony ah chuan ka chhuak a, a thlang huanah chuan ka khawh thla ta per per mai a. Mahse zun laklawh lai chuan ka zu hawithla chuh, huan mawng lampang, hmuh phak si, thla in a en phak si ah chuan, lung lian deuh 1 chunga mi pakhat thu kun deuh ngul hi ka zu hmu a, leather jacket pian anga piang jacket a ha a, jeans nge velvet lampang ka hre chianglo, a zuih deuh lam hi a ha bawk a, ka hmu chiang lutuk. A tirah chuan a thutdan POSI vel atang chuan Dendrite hnim te pawh hi a ang ka tia, ka rilru in 'engpawh chu ni se, min hmuh hmain lut daih ang' ka tia, zun pawh zung zo lo chuan ka lut ta daih a. Chutah pawh chuan ramhuai ang zawngin engmah ka la ngai lo a, ka luh na chhan ber pawh, tlangvala pumpa khatia balcony atanga han zun tur tur kha ka zak a,min rawn hmuh ka hlauh vang zawk mai kha ania.
'
ZAN 4 NA (Sunday) : Haw dawn zan ani bawk a kan tia, nula rimtur kan zawng ve ngei a, mahse hmeltha kan tih alo inang hlawm a ni chek ang chu, unau hmeichhia 3 awmna inah chuan keini pawla mipa zawng zawng deuh thaw chu kan inhmu khawm ta raih a, nuihzatthlak duh angreng, thingpui te inin kan titi a. Nula te zinga naupang ber chuan kan thlen inj min rawn zawt a, keichuan ka sawi mai a, mahse ka sawi zo chiah chu an chhungkua chuan an inmelh ta hrek hrek mai a, ka bangbo nasa mai a. Ka riahpuipa Zela pawh chuan chutia an REACTION (ti ve khanglang ang) chu alo hmu ve kiau a, a ngaih a nuam thei ta der lo mai a lo nia. A zawt ta sek sek mai a, ngatinge kan thlen in chu a ti ta sek a, an han inenkual a, min hrilh chu thain an hria ni hmiang, an nu ber chu a lo tawng chhuak a. In thlenna in saw tun hma chuan nupa rek leh an fapa neihchhun te in a ni a, hausak pawh an hausa a, mahse an fapa neichhun chu TMB in a awmah a chil a, a thi a. Chuan a thla ahrang tih hi sawi a awm zauh zauh a, an gate bulah te sawn a thih dawna a bike Pulsar sen nena alo ding te hi an hmu thin a, a nu pawn an huanah te sawn a hmu fo a, chubakah inchhung velah te pawh thawm a nei thin a ni awm e, a nu leh pa pawh an riak ngam tawh lo a, tisawn in lian tak saw, tlawm tawkin an luah tir ta ringawt a nih saw an ti mai chuh chuh chuh........ka thil hmuh leh hriat ho zawng zawng ka ngaihtuah let a,ka chhut kual a...RAMHUAI/THLAHRANG an tih hi ka hmu a ni ve chiang ngat mai ka ti ta a, ahmaa kan lo uksak lo thleng thleng in....ngatinge KROSS kha an khai, ngatinge inchung hi a changkangin a nuam fe zawk sia, tuna luahtu te hian an luah miahloh tih te, ngatinge rooom pakhat zawk pawh hi tala 2 khera an kalh tih te ka ngaihtuah kai a, awmzia chu a nei ngei ani tih ka hre chiang tawh khawp mai.
'
Ka rilru chu a vak kual nasa ta mai a, mahse tumah ka hrilh chuanglo a. Kan haw phei chuan haw kawngah chuan Zela chu ka hrilh ta vek a,a ni pawh alo phawk ve hrim hrim tawh a, tikhawpa kan lenna chhungkua ten an sawi atang khan a niang chu, "zanah i mut theihloha thawm emaw hmuh emaw i nei anih chuan min rawn kaitho ve dawn nia a tia, kei lah chuan riah leh pawh ka huphurh tawh ani si a, zanin chu meng ve chhin la ka ti ta a. Ani pawh chu thlenin kan thlen phei chuan ka bul pakhat zawka mu Tluanga mutnaah chuan a rawn insawn phei a, kan meng dun ta kar a, dar engzah tak nge pawh ka hre tawh lo, ka riahna chhak zawk tala 2 inkalhna atang ngei mai chuan a hma zana ka hriat ang chiah thaw hah hmel em em leh tawt hmel em em a thaw hruih hruih chu a rawn ri leh ta a, chutah zet zawng inhnuai lampang te aniang ka ti tawh lo chiang khawp mai, zela chu ka va nghawk a, ani pawn a lo hre ve niang chu, ka thu rual thawt a, light a on nghal a,midang tih harh kan duh silo, kan pahnih chuan kan ngaithla ta ran a, ani pawh khan a hmel vel atang khan ka pawm ang chiahin a pawm ve niin ka hria, engmah chu a sawi lem lo a, mahse dar 5 dawna ka lo chhing sek tih loh chu kan meng tlang pap in ka hria, ani phei chu a meng tlang pap. Kan kal dan te leh kan pawl leh programme neihten a zirloh avangin, sawichhuah chiah kan ngai lo a, khatiang tawnga hmu nih kha a inhmehlo kan tidun bawk aniang. Kan haw kawng tluan pawn kan sawi lo a, mahse tun hnu thleng pawh hian Zela chuan a hma zan zawng zawnga ka thil hnuh leh hriat ho te kha kan inhmuh chang hi chuan min zawt chik thin khawp mai.......
THE END
(Hei hi TRUE MAIPAWH NILO TRUTH STORY TAK TAK ANIH HI)
Post a Comment