-Clement Hualngo Chhakchhuak

mizo tawng ziak dan dikl

Mizo țawnga duh zâwng apiang kan sawi par par theih avang hian kan duh tawk tawh em maw tih mai turin, kan thu ziak tam takah te hian ziak lama kan la tlâkchhiatzia a lang chiang hle. Tun hma ațang tawh khan group hrang hrangah, Mizo țawng ziah dan dik chungchangah mi tlawmngai pawlte'n (Mizo țawng humhalh duh pawl) hma an lo la fo tawh a. Hma kan sawn hret hret niin a lang a, chutih rual erawh chuan a kar lakah kan reh leh deuh duak a, mahni țawng suasam pawl an rawn puang leh tawh em maw tih mai turin thu ziak chhiar harsa deuh deuh a rawn lang leh hlauh țhin. Hei hi chu hnam humhalhnaah ngaiin inralrinna dar kan vuak deuh reng a țul tak zetin ka hria.

Mahni intih lar tum ang maiin group tin deuhthawah post siam peih reng, hawrawp ziah dan dik tak erawh zir chhunzawm tum hauh si lo, thu ziak chhiar harsa zet zet mai hmuh tur a la awm fan a, a manganthlak khawp mai. "A sawi tum kan hriat theih chuan a tawk mai alawm" tih changchawiin kan la fak hreh lo ta deuh deuh lehnghal a, kan la mawlzia kan tar lang mai mai a ni.

Group hiala thu rawn post duhte paw'n kan hriat tur atana țha chu, kan thu post duh te hi a dik thei ang berin "edit" hmasak phawt ni țhin se... Group Admin-te hian an lo edit hman vek țhin lo va, in post ang ang te'n an rawn dah lut a, chhiar a hahthlak deuh țhin. Mizo țawng chu kan hre tlâng deuh vek a, ziah dan dik lamah erawh hma kan la lak nasat deuh a ngai ang.

Ziah zawm leh ziah zawm loh tur te hi hriat a ngai a. Hawrawppui hmanna tur leh hawrawp tê hmanna tur te pawh kan chîk lehzual a pawimawh hle bawk. "Biak in" tih turah te hian, post tam takah chuan "Biakin" tia inziak ka hmu fo tawh a. Sentence bul ințannaah kan hmang a nih ngawt loh chuan hawrawpui hi hman a ngai lo va, ziah zawm tur a ni hek lo. Entir nân: kan khuaah chuan kan "biak in" aia tê a awm lo

Ek in, bawng in, vawk in, bual in, ar in, biak in, leh adt. hi ziah zawm a ngai lo va, sentence bul ințannaa kan hmang a nih ngawt loh chuan hawrawppui pawh hman miah loh tur. Țhenkhat phei chuan Pathian biak in a nih avangin hawrawppui hman ngei ngei tur em maw an ti ta țhin a, hawrawppui hi hman tur a ni lo. Grammar chu a nihna ang thlapa ziah mai hi a zahawm em em zawk a ni.

Affix: thuhma bet (prefix) leh thuhnung bet (suffix) hi i zir uar bik lehzual ang u. Sap țawng thumalah leh mi mal (proper noun) hmingah te, thuhma bet leh thuhnung bet (ah, in, a, an, sak, leh adt) zeh duh chang kan nei țhin a, chungah chuan "hyphen" (-) hi a karah ziah tel ngei ngei tur a ni. Entir nân: a) kan țhenawmpa chu an step-ah a tawlh tlu. b) ka nau chu daktawrin in-diet deuh turin a ti a. c) Clement-a chu mi chapo tak a ni. d) Donald Trump-an nupui pathum a nei tawh. e) ka kawr sûk sa hi min lo spin-sak mai ta che.

Mihring famkim tu mah kan awm lo va, tu mah thiam famkim kan awm hek lo. Chutih rual erawh chuan thiam belh tuma kan zir hram hram chuan hma kan sawn ngei ang a, kan thu ziakte pawh chhiar a lo nawm phah bawk ang. Zir peih na na na chuan kan thiam belh nge nge țhin. Mizo kan ni a, mahni țawng ziak thiam lo nih hi thil zahthlak tak a ni tih kan hriat a pawimawh hle bawk.

Post a comment

Powered by Blogger.