times of mizoramSorkar laipuia National Vector Borne Disease Control Programme (NVBDCP) bultuma Mizoram district leh sub-district a Malaria dona kawnga hman tur lirthei (Bolero) thar 10 chu vawiin khan Health Minister Pu Lal Thanzara chuan High Field, Mac Donald Hill-ah a vailiam.


Health Minister chuan kum 2030 a India ram atanga Malaria natna umbo a nih theih nan Sorkar laipuiin nasa taka hma a lak mek thu leh, Mizoramah pawh he hmalakna hi tha zawka kalpui a nih theih nan ’monitoring’ leh tul dang atan hman tur lirthei Mizoramin a dawng chu lawmawm a tih thu sawiin, thawktuten an hman tangkai ngei a beisei thu a sawi a. Kum 2017-2022 chhung atana malaria dona National Strategic Plan (NSP) hnuaiah India state hrang hrangte chu category pali a then niin, kum thum chhunga case neilo, mi 1000 zela case pakhat, mi 1000 zela case 2 aia tamlo, leh mi 1000 zela case hnih aia tam ah te then niin, Mizoram chu category 3-na ah a awm thu Minister hian a sawi a. State Sorkar pawhin Mizoram chu Malaria awmlohna hmuna siam turin kawng hrang hranga hma a lak mek thu sawiin, department a thawktuten theihtawp an chhuah a, sorkar hmalakna mipuiin an tawiawm that chuan a hlawhtlin ngei a beisei thu a sawi bawk.

Vawiina lirthei vailiam puala inkhawm buatsaih hi Dr. F. Lallianhlira, Principal Director chuan a kaihruai a. Dr. Rozama, National Health Mission Director chu he hun hi tel puiin, Health Directorate a thawktute bakah District hrang hranga CMO leh SMO te he programe-ah hian an tel a ni.-DIPR

Post a comment

Powered by Blogger.