Mizoram State AIDS Control Society (MSACS) chuan, nimin khan an pisaa JL Conference Hall-ah Association for Voluntary Blood Donation (AVBD) hruaitute tan thisen pek, voluntary blood donation chungchangah training an buatsaih a, district hrang hrang aṭangin AVBD hruaitute an tel. He hunah hian, Mizoramah mahnia thisen pe ṭhin an pun zel thu tarlan a ni.
Induction Training & Joint Meeting-ah hian MSACS project director Dr Lalmalsawmi Pachuau chuan, Mizo ṭhalaite'n thisen thianghlim an pek zel theih nana
ṭang tlang zel turin AVBD hruaitute a sâwm a; a thlawna pek bik nei loa thisen pek (voluntay blood donation) a tam zel theih nan bakah, ṭhalaite'n thisen thianghlim an pek theih nan ṭan lak zel a ngaih thu a sawi.
Dr Lalmalsawmi Pachuau chuan, tunlaiin ruihhlo (drugs)-a inchiu a hluar hle tih sawiin, "Tun hma chuan district khawpuiahte chiah ruihhlo (drugs) hmuh tur a awm ṭhin a, tunah erawh chuan thingtlang kilkhawr tak takah pawh awlsam taka hmuh tur a awm tawh a ni," a ti.
Mizoram State AIDS Control Society (MSACS) Hmalakna
MSACS Project Director chuan, ruihhlo a hluar avangin Kolasib leh Champhai district-ah chuan tun hnaiah mipat hmeichhiatna aṭanga HIV hrik pai hmuh chhuah aiin, ruihhloa inchiu ṭhinte zingah HIV hrik pai hmuh chhuah a tam zawk tih a sawi a; HIV/AIDS dona chu sorkar leh kohhrante'n tih tak zeta an kalpui phawt chuan hmasawnna a awm ngei a beisei thu a sawi bawk.
Training-ah hian State Blood Cell-a state nodal officer Dr Eric Zomawia'n thisen pe tura inzirtir, mite fuih phûr chungchang leh thil pawimawh hrang hrangte a sawi a; AVBD General Headquarters leh district hrang hranga AVBD branch hruaitute'n an district ṭheuh dinhmun an sawi.
Chawhnu lamah motivation campiagn neih leh blood donation calendar siam chungchangte leh thil pawimawh dangte an sawiho bawk.
AVBD general secretary C Lalnunnema'n Mizoram pum dinhmun a sawi danin, voluntary blood donation rau rauah, donation camp-a pe ni lo, mahnia blood bank-a kala thisen pe ṭhin (individual donor) an pung tial tial a; sorkar kum liam ta, kum 2016-17 ah phei chuan individual donor hi thisen pek zawng zawng unit 25,895 aṭangin unit 5,140 (19.85%) a tling tawh a ni. -Vanglaini
Post a Comment