Mizoram governor leh central yma hruaituteMizoram Governor Lt. Gen. Nirbhay Sharma PVSM, UYSM, AVSM, VSM (Retd.) chuan vawiin chawhnu khan Central YMA hruaitute chu a pisaah Kumthar thingpui inpuiin, an hmachhawpte a sawipui.

central young mizo association hruaituteGovernor Lt. Gen. Nirbhay Sharma chuan CYMA-in drugs do kawnga a hmalakna chu fak tlak a nih thu leh thangthar lo la awm zel turte an chunga an la lawm tur thu a sawi a. Sawrkar leh kohhranin a tih tur a tih rualin, khawtlang pawhin kan do a tul a ti a, a dotu zingah inhnamhnawih kan awm chuan kan hneh thei dawn lo a ni, a ti. Mizoramah lehkhathiam an tam a, hnathawk erawh an tlem tiin, thawh hreh kan neih loh a ngai a ti a. Hei hian hnam dang hnathawka lo lut pawh a tih tlem phah dawn a ni, a ti. Khawvel inher danglam chak tak karah Mizoram chhunga hahdam taka kan awm a rem tawh lova, khawvel ramdangte elpha tura kan inpuahchah a ngai a ti a. Huaisen taka mahni kea kan din ngam a tul a ni, a ti bawk. Kum 2018 chhunga Mizoram Drug Free State-a siam chu chona ah ngai turin a fuih a ni.


CYMA hruaitute chuan drugs do chu thil awlai tak a ni loh thu leh sawrkar hotute hnena hremna dan khauh leh na zawk duang tura an thlen tawh thu an sawi a. Tunhnaia Assam sawrkarin draft National Register of Citizens (NRC) a pholan chu tha an tih thu sawiin, Mizoramah pawh dan lova chengte dapchhuah tha an tih thu an sawi a. Assam Rifles-te Aizawl khawpui chhung atanga Zokhawsanga sawn chhuah chungchangah hma lak pui turin an ngen bawk a ni.-DIPR

Post a comment

Powered by Blogger.