Central Young Mizo Association (CYMA)Governor Lt. Gen. Nirbhay Sharma chuan nimin khan a pisaah Central YMA hruaitute a kâwm a; CYMA hruaitute chuan, ruihhlo vanga mante na zawka hrem an nih theihna atan dan siamṭha turin sorkar hotute hnenah ngenna an thlen tawh thu an sawi.
Governor chuan, ruihhlo do kawnga CYMA hmalakna fakawm a tih thu sawiin, "Ṭhangthar la awm zel turte in chungah an lawm ngei ang. Sorkar leh kohhranin a tih tur a tih rualin, khawtlang pawhin kan do a ṭul a, a dotu zingah inhnamhnawih kan awm chuan kan hneh thei dawn lo," a ti a; kum 2018 chhunga Mizoram Drug Free State-a siam chu chonaa ngai turin a fuih.

Mizoramah lehkhathiam an tam a, hna thawk erawh an tlem tih sawiin Larsap chuan, "Thawh hreh kan neih loh a ngai. Hei hian hnam dang hna thawk tura lo lut pawh a tihtlem dawn a ni. Khawvel inher danglam chak tak karah Mizoram chhunga hahdam taka kan awm a rem tawh lo," a ti a; khawvel ram dangte elpha tura inpuahchah a ngaih thu a sawi.

Central YMA hruaitute chuan, ruihhlo do chu thil awlái a nih loh thu sawiin, "Ruihhlo vanga mante hremna dan khauh leh na zawk duang tura rawtna sorkar hotute hnenah kan thlen tawh a ni," an ti.

Tun hnaia Assam sorkarin draft National Register of Citizens (NRC) a pholan chu ṭha an tih thu sawiin CYMA hruaitute chuan, "Mizoramah pawh dan loa chengte dap chhuah ṭha kan ti a ni," an ti a; Assam Rifles-te Aizawl khawpui chhung aṭanga Zokhawsanga sawn chhuah chungchangah hmalakpui turin Governor an ngen nghal.

Larsap Lt.Gen. Nirbhay Shar­ma an hmuhnaah huian CYMA hruaitute hi an president Vanlalruata'n hoin office bearer-te an tel kim a ni.-Vanglaini

Post a comment

Powered by Blogger.