Aizawl leh khaw ṭhenkhata kohhran eng emaw zat chuan kum 2017 Krismas leh 2018 kum thar lawmna ruai ṭhehna thleng atan kuhva káwr ro aṭanga siam thlêng (disposable plate) an hmang. Thlêng an hmante zinga tam tak chu Bilkhawthlira siam niin, thleng 5,000 - 6,000 vel an pe chhuak a; Bilkhawthlira siamte'n a daih loh avangin Silchar lama siam hmang an awm nual bawk.
Kuhva kâwr aṭanga siam thlêngte chu ṭawih thei a ni a, leilung leh boruak tichhe lo zawk tura ngaih a nih avangin environment lam humhalh kawnga hma latu pawlte leh Aizawl Municipal Council (AMC) lamin Krismas leh kum thar lawmna ruaiah hmang uar turin an ngen a; kohhran eng emaw zat chuan thermocol aṭanga siam disposable plate aiah an hmang ta a ni.
Boruak leh leilung chhe tur venna atan kuhva káwr aṭanga siam thleng leh note hmang uar tura ngenna a awm rual hian, lei tur a tam tâwk loh avangin kum hmasa lama thermocol aṭanga siam disposable plate hman aiah, steel thleng hmang an awm nual bawk.
Kuhva Káwr Ro Aṭanga Siam Thlêng - Bilkhawthlirin ruaiṭhehna atan thleng 5,000-6,000 hralh chhuak
Mizorama kuhva káwr aṭanga thleng siamna pui ber chu Bilkhawthlirah a awm a, khaw dangin an la siam ve vak lo nia thu dawn a ni. Bilkhawthlir hi kuhva ngah khua an ni a, an tan kuhva káwr aṭanga thleng siam pawh a awmsam bik a, thleng siamtute chu Bilkhawthlir South V/C huam chhunga mite an nih thu an sawi.
Bilkhawthlir South-a self help group (SHG)-te intêl khawmna Village Organisation (VO) president Lalduhsaki chuan Vanglaini-in palai zawhna chhangin, Krismas leh kum thar lawmna ruai ṭhehna atan chaw thleng 5,000 aṭanga 6,000 vel an hralh chhuak tih a sawi a, "Kan la siam chhuah tam loh avangin hralh tur kan la ngah lo a ni," a ti.
Lalduhsaki chuan, March 29, 2017-ah kuhva káwr aṭanga thleng siamna khawl Indian Council of Agricultural Research (ICAR), Kolasib aṭangin an dawng ṭan tih sawiin, "April 4, 2017-ah khawl tinung ṭanin thleng kan siam ṭan," a ti a; kumin ṭhál chhoah thleng tam zawk siam theih an inbeisei thu leh, chaw thleng bâkah, plate tê leh bowl an siam thu a sawi.
Lalduhsaki sawi danin, Bilkhawthlir South huam chhungah hian SHG 14 an awm a, chu'ngte chuan kuhva káwr aṭangin thleng an siam vek a ni. SHG pakhatah member 5-10 an awm thlengpuiin, an vaiin member 130 vel an ni a; SHG ṭheuhte president leh secretary kal chhuak zel chu VO-ah an tel.
Chaw thleng lian pakhat chu Rs. 5-in an hralh a, nikum Krismas leh kum thar lawmna ruai ṭheh nan 5,000 - 6,000 an hralh avangin Rs. 25,000 - 30,000 vel an la luta ngaih a ni a; bowl leh plate tête chu pakhat Rs. 2.50 in an hralh thung a ni.
Thleng leh no siam nan hian kuhva rah bâwr tuamtu a kau ro an hmang a, leia tla an chhar khawm ṭhin. A bul lam chhah lai leh a hmáwr lam an paih a, a lai hlai ṭha lai chu an tihfai hnuah thleng leh bowl siam nan an hmang ta a ni. Plate pakhat siam nan hian minute khat vel a ngai tlangpui. -Vanglaini
Post a Comment