MZP HEADQUARTERS BIATE-IN DIAMOND JUBILEE
Vawiin chawhma dar 10 khan Zialung Community Hall Biateah MZP Headquarters Biate chuan  Diamond Jubilee lawmna hun an hmanga. He hun hi Cooperation, Sericulture, Fisheries Dept changtu Minister leh bialtu MLA nibawk Pi Vanlalawmpuii Chawngthu chuan khuallian niin a hmanpui.



Khuallian Pi Vanlalawmpuii Chawngthu chuan MZP Hqtr. Biate ten Pathian kaihhhruaina dawnga Diamond Jubilee an lawm thei  chu a lawmpui tak zet thu a sawi a. Lawmna hun hmang tura Zialung Comminity Hall-a kalkhawm zirlaite chu thiamna tak tak zirchhuaka nakin huna ram leh hnam innghahna nih tum theuh turin a fuih a. Zirlai nih chhung chuan lehkha chhiar tam a ngaia; social media hman kawngah chin tawk neih a ngaih thu leh thu dik leh diklo thlifim thiama, belhchian dawllo thehdarhlo turin a chah a. Zofate inpumkhatna kawnga Mizo Zirlai Pawl (MZP) hmalakna chu fakawm tiin, Zohnahthlakte chu a takin awmho thei rihlo mah ila rilru hmunkhat pu chung zela kan thawhho a ngai a ni, a ti a. 

Bialtu MLA chuan zirlaite chu nupui pasal zawn kawngah fimkhura mahni hnampui ngei nei turin a chah a. Hnam tidaltu niloa chawinungtu nih a ngai a ni, a ti. Hnam changkang leh ropui apiangin zirna an ngaihpawimawh thu sawilangin zirlaite chu zirna ngai pawimawha, Mizoram tan engnge ka thawh ve theih ang tih ngaihtuah thin turin a chah a. Zirna lama tan lak a tul thu sawiin hemi kawngah hian zirlai hruaitute chu hmahruaitu entawntlak leh kawng kawhhmuhtu an nih a ngai a ni, a ti a. Kalkhawmte chu ngaihsan tur  dik tak ngaihsanna chang hre tura a duh thu sawiin, dik taka thawka mahni kutkawih leh thawhchhuah ngei mai hmanga nung thinte kan ngaihsan a hun tawh a ni, a ti a. Hun vawn dik kawngah nasa zawka tan lak angaih thu tarlangin zirlai hruaitu leh zirlaite chuan hun vawn dik kawngah hmahruaitu an nih a tul thu a sawi a. Ram leh hnam humhalh kawngah zofate hian kan ram neih chhun hi kan humhim angaia, anih loh chuan tu fa mahin min tih sak dawn lo a ni, a ti a. Diamond Jubilee hmang tura kalkhawmte chu hun hlimawm tak hmang turin duhsakna hlan nghal a ni.

MZP HEADQUARTERS BIATE-IN DIAMOND JUBILEEVawiin chawhma Diamond Jubilee lawmna hun hi Pu H.Laldinpuia, President MZP Hqtr. Biatein a kaihruaia. Diamond Jubilee puala buatsaih Zialung Souvenir chu Khuallianin a tlangzarha. MZP Hqtr Biate ten chawimawina Pu R. Lalremkunga President, Biate Branch YMA leh TV L Ramdinliana Renthlei, President MZP Gen. Hqtrs-te hnenah an hlan a. He hunah hian Pu L.Malsawma Colney, Adviser, MZP Gen. Hqtrs leh Tv L. Ramdinliana Renthlei, President, MZP Gen. Hqtr-te pawhin thu an sawi bawk a ni. Chawhnu lamah programme hi chhunzawm niin hruaitu hlui chawimawina neih a ni a. Hemi zawhah hian Diamond Jubilee puala buatsaih ruai theh niin zan lamah zirlaite pualin hun hlimawm tak hmanho leh a ni.

Tukin zing dar 7 khan Diamond Jubilee hriatrengna lungphun chu Tv L. Ramdinliana Renthlei chuan a lo hawng tawh bawk a ni. Vawiin Diamond Jubilee lawmna hunah hian zirlai, khawtlang hruaitute leh MZP hruaitu thahnem tak an tel a ni. -DIPR

Post a comment

Powered by Blogger.