CHENNA IN ZAWNG ZAWNGIN ENG AN NEIH THEIHNA TUR "SAUBHAGYA SCHEME" CHIEF MINISTER IN A TLANGZARH

"SAUBHAGYA SCHEME" Hi Enge Ni ?


India ram puma chenna In zawng zawngin eng an neih theih na tura sawrkar laipui hmalakna thar Pradhan Mantri Sahaj Bijli Har Ghar Yojana, SAUBHAGYA tia sawi bawk chu Mizoram tan vawiin khan Chief Minister Pu Lal Thanhawla chuan Synod Conference Centre, Aizawl-ah a tlangzarh. Hemi rual vek hian Mizoram District hrang hrangah he scheme hi tlangzarh a ni ve bawk.


Chief Minister chuan hmalakna duhawm leh tangkai tak tur Mizorama tlangzarh a ni ta chu lawmawm a tih thu sawiin, Sawrkar laipuiin ram pum tan he hmalakna tihhlawhtlin hun tur a tuk chu March, 2019 ni mah se Mizoramah chuan kumin December ral hma ngeia zo tura ruahman a ni, a ti. Kuthnathawktu mi harsa ten leirem an rah a chawikan a nih theih nana hmalakna NLUP avanga dinhmun tha zawka ding ta te ngaihven zuina ni pah fawm, Mizoram chu ei tawk tawk (subsistence) economy atanga market economy a siamna tur NEDP hlawhtlinna atan kawlphetha supply tha a pawimawh thu a sawi bawk a. Sawrkar in kawlphetha in a thlunzawm loh in leh khua engemawzah la awmah ngawrh taka hma a lak thu te, chenna In pakhat mah hmaih a nih loh nan a fal deuh a awmte pawh nizung chakna hmanga eng pek an nih theih nan ruahmanna a awm thu a sawi a. Mithiam ten an chhut danin Mizoram chuan Hydel Power Project atangin kawlphetha megawatt sang tam tak siamchhuak thei ni mahse ram leilung leh boruak a ngawng dan tur ngaihtuah tel zelin a pawilo thei tur chin a hma lak a nih thu leh, ram thang zel avanga power mamawhna sang belh tur pawh Solar energy lama hmalakna hian engemaw chen chu a phuhruk thei dawn a ni, a ti a. SAUBHAGYA Scheme chu state dangte aiin tlangzarh tlai deuh ni mahse Mizoram chuan a zo hmasa ber thei a ni, a ti bawk.

 "SAUBHAGYA SCHEME" CHIEF MINISTER IN A TLANGZARH

Chief Minister Pu Lal Thanhawla chuan Mizoram chu India ram puma GSDP sang ber pawl a ni thei chu lawmawm a tih thu leh, NITI Aayog phei chuan kum 2017-18 chhunga Mizoram GSDP chuan double digit a kai theih mai an rin thu te tarlangin, heng hmasawnna hi state sawrkar hmalakna hrang hrang hlawhtlin vang a nih bakah sawrkar hnathawkte thawh that zar a tih loh theihloh a ni, a ti a. Vawiina hmalakna thar tlangzarh tak pawh a hlawhtlin ngei theih nan kalkhawmte chu an hnaah thahnemngaihna chhawmnung zel turin a chah a ni. Chief Minister chuan sawrkar hmalakna hrang hrang zarah Mizoram chuan reiloteah thenawm state te aia kawlphetha tam zawk a siamchhuah vat a beisei thu a sawi a. Chutihrual chuan heng hmalaknate hi a hlawhtlin dawn chuan mipui pawhin inrenchem nachang kan hriat thar a tul a ni, a ti a. Chu bakah chuan kawlphetha hi tangkai viau mahse fimkhur nachang hriat a tul a ni tiin, thiam chiang lova electrical wiring lo kawih ve ringawt te hian thil pawi zawk a thlen theih thu a sawi a. Mizoram chu India puma Transmission and Distribution Loss (kawlphetha semchhuah leh pekchhawnna a hloh) sang ber a ni chu thil lawmawmloh tak a nih thu Chief Minister hian sawiin, a chhan tam tak awm thei zingah meter diklo leh khawihchingpen te, staff thawh that tawk loh leh ruk ruk chin vang te a tel theih thu sawiin, pawikhawih zawnga chet chu thil tih miahloh tur a ni, a ti. SAUBHAGYA hnuaiah hian BPL chhungkuate chu a thlawn in electric connection pek tur tih a ni chu lawmawm a tih rualin Chief Minister chuan a thlawn a dawn tur awm thei beisei avanga BPL nih chakna rilru pu an awm loh a beisei thu a sawi bawk.


SAUBHAGYA hi Rs. 16,320 crore hu project niin, India ram Prime Minister chuan September ni 25, 2017 khan a tlangzarh a. Thingtlang mi nuai 400 a tuam dawn a. Mizoram pawhin November ni 6, 2017 khan Sawkar laipuiah Letter of Intent (LOI) lo thehlut tawhin, tun thla chhunga DPR pawh thehluh hman tumin hma lak mek a ni bawk. He project hnuaiah hian chenna In bakah thlam pawh a huam theih nan hmalak a ni a. Sum senso tur chungchangah sawrkar laipuiin 85% tumin, 10% chu loan angin pek a ni ang a. A dang 5% chu State in a tum ve tur a ni. Mizoramin a tum anga  December 2018 ral hmaa project hi a thawh zawh hman chuan Loan chanve hi "grant" a kaltir a ni ang.

He scheme hian DDUGJY Scheme hnuaia a thlawna Electric Connection nei thei zinga telh Ioh BPL chhungkaw tan a thlawnin Electric connection a lak theih dawn a. BPL a tello chhungkaw tan pawh Electric connection hi Rs.500 in a tih theih ang, Rs.500 hi Rs.50 zel a vawi 10 installment-in electric bill pek rualin a rulh theih tura ruahmanna siam a ni ang. SAUBHAGYA hnuaia Electric connection pek dawnin service line cable, prepaid/smart energy meter, single point wiring, LED lamp leh a tul dang te a keng tel ang. Energy meter kal tlang lo chuan Electric connection hi pek loh tur a ni a. He Scheme hnuaiah hian Electric Bill pek theiloh leh thil dang vanga disconnect tawh consumer te a huam lo ang.

SAUBHAGYA tlangzarhna inkhawmah hian Chief Minister chuan Scheme chungchang ziahna booklet hi a tlangzarh nghal a, tlangzarhna inkhawmah hian Deputy Chief Whip Pu R.L. Pianmawia leh ZIDCO Chairman Pu V.L Robiaka ten an telpui a. Pu H. Lalengmawia, Power & Electricity Department Secretary chuan hun hi kaihruaiin, Er. L. Pachuau, Engineer-in-Chief, Power & Electricity Department chuan SAUBHAGYA chungchang leh a thil tum te sawifiahna hun a hmang a; Er. Lalduhzuala Sailo, Joint Secretary chuan lawmthu sawiin hun hi a khar a ni.-DIPR

Post a comment

Powered by Blogger.