PU R ROMAWIA’N GOVT. T. ROMANA COLLEGE-AH LEGAL AID CLINIC A HAWNG
Vawiin khan Higher & Technical Education Minister Pu R.Romawia’n Govt. T.Romana College-ah Legal Aid Clinic a hawng.
Pu R.Romawia chuan dan chu mi zawng zawng inlungrual leh him tlang taka kan awm khawm theih nana siam a ni a, chumi kalha khawsa te tan misual hremna dan siam niin mipui himna tihchhiat a nihlohna turin dan bawhchhiate insiamthatna tur hmun Jail siam a ni, a ti. Mi dikte mi sual hrema hrem an nih loh nan dan siamtute an fimkhur hle a, dikna in ro a rel theih nan mi rethei tak tak, Ukil rawihna man nei lo te pawhin buaina an tawha a thlawna an tana din sak turin sawrkarin Ukil a rawihsak thin, a ti a. T.Romana College-a hawn thar Legal Aid Clinic chu College zirlaite tan mai bakah Republic Veng leh a chhehvela mipui mamawhtu apiang tan a tangkai a beisei thu a sawi.
Sr.Civil Judge leh Aizawl District Legal Services Secretary Pi R.Lalduhawmi chuan Legal Aid Clinic chungchang sawiin Aizawl District-ah sawmpathum a awm a, dan lama thurawn la duh te leh finchhuah ngaite tan heng clinic hi a tangkai hle a ni, a ti. National Legal Service Authority hnuaia din Mizoram State Legal Services Authority hian Mizoram District tinah hmun an nei a, mipui court tia hriat Lok Adalat te neih puiin dan lama harsatna nei apiang te chhawr tangkai tura dah a nih thu a sawi.
Legal Aid Clinic hawnna inkhawm hi Govt. T. Romana College Principal Dr. Lalrintluanga’n a kaihruai a, Pi Lalrinnungi Sailo leh Pu Lalthansanga, Govt. T. Romana College Associate Professor te pawhin thu an sawi a ni. Programme-ah hian zirlai leh zirtirtute bakah Republic Veng khawtlang hruaitute leh NGO hrang hrang hruaitute an tel a, Legal Aid kaihhnawih sawihona hun an hmang bawk. -DIPR
Post a Comment