Rawngbawltu ropui Billy Graham
Pathian thuhriltu ropui Billy Graham chu February 21, Nilaini khan khawvel chuan a chan ta a, a thih hian kum 99 mi a ni. A dam lai hian khawvel ram 185 zetah rawngbawlna a kalpui hman a, amah zuitu hi mi maktaduai 215 vel zet awm anga chhut a ni. Lehkhabu eng emaw zat a ziak a, chung zingah chuan kum 1997-a a tihchhuah 'Just as I Am' tih chu a lar hle.
Pian leh murna
Billy Graham hi November 7, 1918 khan Charlotte, North Carolina, U.S-ah a piang a, a hming chu William Franklin Graham Jr. a ni. Morrow leh William Franklin Graham Sr. fa pali zinga upa ber niin, an chhungkua hi ranvulha eizawng an ni. Billy Graham hian naupangte a nih lai aṭangin lehkhabu a chhiar nasa hle a, Pathian thu chhiar nuam a ti hle. Kum 1943 khan Wheaton College aṭangin a graduate a, anthropology-ah degree a nei. Kum 16 mi a nihin evangelist Mordecai Ham rawngbawlnaah a piangthar a, Pathian rawngbawlin a penchhuak zui a ni. Amah hi Baptist pastor a ni.
Rawngbawlna lam
Billy Graham hi rawngbawltu atana serhhran a nih hnuah pawh a lar nghal mai bik lo a, khawvela thuhriltu ropui ber pawl a la ni ang tih pawh a inhre bik kher lo ang. Kum 1937 khan Florida Bible Institute, Florida-ah sawn a ni a, hemi kum vek hian a sermon hmasa ber chu Bostwick Baptist Church-ah a thlak. Southern Baptist minister atana ordain a nih hnuah thuk zawkin rawngbawlna a kalpui a, kum 1949 chho kha chuan US lamah a lar tawh hle a ni. Biak-in chhung leh kawtthlerahte rawngbawlna a nei ṭhin a, a thusawi hi radio leh television-ahte pawh pek chhuah ṭhin a ni.
Kum 1947 aṭangin Billy Graham Crusade a kalpui a, hei hi rawngbawlna aṭanga a chawlh kum, 2005 theng khan kalpui a ni. Hei bakah hian 1950-54 chhung khan radio show 'Hour of Decision' a nei a, hei pawh hi a lar hman viau bawk. BMS World Mission leh Global Mission kaltlangin rawngbawlna nasa takin a kalpui a, khawvel ram 200 dawnah a kalpui. Hmun hrang hrangah Pathian hminga inpawlkhawmna hun a buatsaih a, a rawngbawlna hi mi maktaduai 200 chuangin an chhim a ni. A sermon ngaithla tur hian mi nuai chuang fe an punkhawm chang a awm fo a, television kaltlangin mi tam takin an thlir ṭhin bawk.
Billy Grahama rawngbawlnaah hian mi maktaduai 3.2 velin piantharna an chang a, rawngbawltu zinga thiltithei leh Pathian mi hman ber zinga mi a ni. Chhut mite chuan Billy Graham-a rawngbawlna aṭanga piangthar hi khawvelah an tam ber hial niin an sawi a, kum zabi 20 hnua lama Pathian rawngbawltu ropui ber a ni, an ti. An ram tan pawh a thawh hlawk hle a, America president te hnena Pathian thu hrilh ṭhintu a ni. U.S president 33-na Harry Truman hun lai aṭanga Barack Obama hun thleng khan spiritual adviser hna hi a thawk a ni.
A hun hnuhnung
Kum 2005 khan rawngbawlna aṭangin a chawl a, hetih lai pawh hian kum 87 mi zet a ni tawh. A kum a tam tawh avangin a taksa pawh a chak tawh lo a, mipui hmuha a inlan tawh meuh lo. A hun tawp lamah hian cancer natna neiin, pneumonia leh natna hrang hrangin a tlakbuak bawk. Kum 2005 khan Queens, New York-ah thu a sawi a, hei hi mipui hmaa a thusawi hnuhnung ber a ni. Hemi ṭum hian mi 2,00,000 chuang an pungkhawm a ni. Kum 2007 khan a nupui Ruth Graham chuan a thihsan a, amah pahin a tuar hle. February 21 khan an ram huna zing dar 8:00-ah a chenna Montreat, North Carolina-ah a thi ta a ni. US president ni lai President Donald Trump chuan, "Billy Graham anga rawngbawltu ropui hi khawvelah tumah an awm lo" tiin a ui thu a sawi.
Billy Graham :
- November 7, 1918 khan William Franklin Graham Jr. tih hmingpuin a piang.
- 1934 - Evangelist Mordecai Ham rawngbawlnah a piang thar.
- 1938 - Baptisma a chang a, Baptist minister atan ordain a ni.
- 1939 - Hun puma rawngbawl turin nemngheh a ni.
- 1949 - A vawi khat nan Los Angeles-ah mipui hmaah a sermon.
- 1957 - New York, Madison Square Garden-ah kar 16 chhung rally a nei a, mi maktaduai hnih chuangin an chhim.
- 1983 - President Ronald Reagan chuan US khua leh tuite chaawimawina sang ber Presidential Medal of Freedom a hlan.
- 1995 - San Juan, Puerto Rico-ah a sermon a, ṭawng 102-a lehlin niin ram 175-ah pek chhuah a ni.
- 2005 - Crusade hnuhnung ber a nei a, mi 90,000 an tel.
- 2018 - February 21 khan Pathian rawngbawltu ropui Billy Graham chuan khawvel a chhuahsan a, March 2-ah vuiliam a ni ang.
-Vanglaini
Post a Comment