Mizoram Baptist Kohhran Rorelna sang ber, BCM Assembly Rorel vawi 122-na chu March 7-11, 2018 chhung hian Mizoram Baptist Kohhran Biak In, Zotlang, Lunglei-ah zanin atangin tan a ni dawn ta. Mizoram chhung leh ram pawn atangin Rorel Palai member leh Delegates engngemawzat lo thleng tawhin vawiin hian a tam ber chu lo thleng tura beisei an ni.
Sawi tawh ang khan kumin Assembly thupui tur chu “I ram lo thleng rawh se’ tih a ni ang. Assembly-ah hian Rorel Palai kal thei tura beisei zat hi mi 1000-1200 vel an ni dawn a, heng bakah hian observers, Co-opted leh delegates (Kohhran dang leh Assocition dang atanga palai) engngemawzat an awm dawn a ni.
Zanin inkhawm hi Assembly hawnna inkhawm a ni ang a, Rev. H. Lianngaia, BCM President-in inkhawm kaihruaiin Assembly a hawng nghal ang. Rev. F. Ramdinmawia, General Secretary-in kum 2017 -2018 chhunga BCM Rawngbawlna report tlangpui a pein, Rev. V. Laltlanzuala’n thuchah a sawi ang a, Zaipawl pali – Lawngtlai ‘S’Pastor Bial Zaipawl, Lungrang Pastor Bial Zaipawl, Bungtlang Pastor Bial Zaipawl leh Zobawk ‘N’ Pastor Bial Zaipawl te an zai dawn a ni.
Naktuk, March 8, 2018 zing dar 9:30 atangin Assembly Rorel Inkhawm neih tan a ni ang a. Kumin Assembly Rorel Agenda ah hian BCM Committee lian hrang hrang – Central, Mission, Service, Noimination leh Assembly executive Committee atanga thu lut lut te bakah ABC hrang hrang atanga thu lut Agenda 59 a awm a, Assembly Rorel Inkhawm hi ni thum chhung awh tura ruahman a ni.
Source: BCM
Source: BCM
Post a Comment