~ RL Kawlni RL
Memorandum of Settlement-ah UT ramri rin a nih avangin kan Politician ṭhenkhatten Pu Laldenga an dem thin. Hei hian Pu Laldenga laka beiseina kan neihsan zia leh kan dah ropui zia a lantir.
Mizoram ramri hi Pu Laldenga pian hma daih kum 1875 ah Sapho hriatpuina hnuaiah siam fel a lo ni daih tawh a. Pu Laldenga'n MOS a sign ruala a thara siam leh mai chi pawh a ni lo. Pu Laldenga khan Assam sorkar hnuaiaCachar leh Mizoram District Council ramri, UT ramri in a rin nghal kha 'Barhlui Ramri' tiin a sawi ṭhin.
Pu Laldenga khan Greater Mizoram, Mizo hnahthlak zawng zawng chenna Burma ram thenkhat te, Chittagong Hill Tracks leh Tripura Zampui tlangdung leh Assam ram chhung Mizo hnahthlakte chenna zawng zawng hi Mizoramah khungluh vek tumin hma a la a, Mizoram UT huamchin kha Mizoram a ti ngai lo.
Pu Laldenga Chief Minister a nih lai khan Aizawl Tourist Lodge, Chaltlang ah North-East Chief Minister ten Conference an neihnaah Assam Chief Minister PK Mohanta kha Mizoram MLA pahnih khatte nen an kawm fâl a. *"1875 a siam Mizoram chin kha enchiangin kan tifel tur a ni"* a tiin a rawt a. Assam chief Minister pawhin Pu Laldenga thusawi chu a ṭawmpui a. Pu Laldenga chuan *"Dan lo anga kan ram ngaw tichhia a, kan ram leilung hauhsakna in lo lak tawh hi ram luahman nen Compensation min pek a ngai ang* tiin Mohanta chu a hrilh a. Assam aiawhte chu kum 1875 ramri enfel tura Mizoram Sorkar Official te hmu tura lo kal turin a ngen bawk a.
Assam lam hi an muangchan deuh avangin Pu Laldenga khan 1988 kum tir lam khan Assam CM Mohanta a zuk hmu a, he thu bawk hi a zuk sawipui leh a. A rang thei ang bera Assam aiawh te ramri chungchanga Mizorama lo kaltir turin a hrilh nawn leh a ni.
Hetih lai hian vanduaithlak takin MNF MLA thenkhatin Pu Laldenga an phatsan a, khatih laia Congress MLA te nen khan Sorkar siam hova Minister a hlankai an tiam a. MLA lungawi lote chu MOS dah turin Pu Laldengan ruahmanna siamin sorkar kaltir leh a tum mek laiin, dan lo angin 8/9/1988 ah Pu Laldenga (MNF) Sorkar chu namthluk a ni ta a ni.
Hetih lai hian Governor kha
Congress pachal a ni a, ani kha Mizoram President Rule a dah tura recoment na lehkha hmanhmawh taka siam turin tuten emaw an nawr a. Central Congress sirkar khan Mizorama MNF lian zel tur tihchhiat nan Pu Laldenga lalṭhutthleng laksak kha an duhthusam a nih avangin Pu Laldenga Ministry chu namthluk a ni a, MNF chu an duh ang ngei tiphelin MNF D a piang ta a ni. Congress game, MNF tihchhiat tumna hi Assam nena kan ramri chungchang sawi tura ruahmanna thlenga nghawng ṭha lo chhuahtu a ni ta zel hi a pawi hle.
Pu Laldenga rawt ang hian October 1988 khan Assam sorkar aiawh engemaw zat Cachar DC leh BRTF leh BSF hotu te nen ramri chungchang chu sawi ho a ni ta tho va. Hetah hian Mizoram aiawhte chuan kum 1875 ramri kha kan ram a nih thu an sawi a. Assam aiawh ten Kum 1933 ramri kha an ramri anih tawh thu an sawi a. Thutawp an siam theih loh avangin thuneitu sang zawk rawnin inbiak nawn leh ni rawh se tiin boruak tha tak hnuaiah inbiakna tih tawp ta rih a. Kum 1989 inthlanah centre duh leh tum ang ngeiin Congress a sorkar a, Pu Lal Thanhawla CM a ni a, Laldengan engmah a sawi thei ta lo.
Congress sorkar hnu 1990 ah Pu Laldenga hmalakna anga sawiho a nih khan 1875 ramri leh 1933 ramri kalna Ground Demarcation neih tura rel a ni. Heta meeting minute te hi record ah la vawn that reng a ni. Mizoram aiawha signatory te hi P. Lungliana MCS Revenue Director, Pu S.Rolianthanga te an ni.
He meeting minute bawhzui tur hian Assam CM chuan Mizoram CM chu Guwhati a chhuk turin a chah ta a. A hriate sawi danin kan CM chuan *Kei aia naupang leh junior zawk CM in a duh hun huna min koh tur ka ni lo* tia a kal duh loh avangin minute chu umzui lohin a awm hlen ta a ni.
Assam Revenue Secretary chuan Inner line reserved chhungah kan mi leh sa an tam tawh a, Mizoram Sorkarin a rawn umzui si lo va, Ground Demarcation ti lovin file chu a khar ta tiin Pu Ngurchhinga Sailo vin a ziak.
1986 inremna khan UT ramri chin huam rih mah se, Pu Laldenga khan kan pi pute luah chin ram humhalh tura beih a ṭhulh chuang lo. Chief Minister rei lote a nih chhung khan nasa takin hma a la zui kha a fakawm hle a.Term khat tal CM ni ta se ramri a kan buaina tam tak hi kan pumpelh ngei a ang.
Post a Comment