Vawiin khan Lunglei Press Club-ah Zochhiar nitin chanchinbu kum 15-na leh Changdam Weekly kum 10 tlin lawmna neih a ni a. Pu Zonunsanga Khiangte, MJA General Headquarters Vice President chuan khaullian niin a hmanpui.
He lawmna inkhawm hi Pu Eric R. Zomuanpuia’n a kaihruai a. Khuallian Pu Zonunsanga Khiangte chuan Zochhiar chanchinbu in kum 15 leh Changdam Weekly in kum 10 an tling thei chu a lawmpui takzet thu sawiin hun lo kal zel tur atan duhsakna a hlan a. Zochhiar leh Changdam Editor-ten buaina leh harsatna karah chhel taka an hna kum tam tak an kalpui avangin an fakawm takzet a ni tiin chanchinbu mi ni tur chuan tawrh peih leh retheih inhuam a ngai a ni, a ti. Chanchinbu miten thudik an tan tlat tur a ni tiin kalkhawmte chu an thuchhuah chu thudik a ni em tih finfiah hmasa thin turin a chah a. Chanchinbu mite chu anmahni invawng zahawm tur leh an nun fimkhur turin a chah bawk.
Lawmna inkhawm-ah hian Lunglei DIPRO Pi C.Lalremruati leh Lunglei District MJA President Pu H. Lalthansanga te pawhin thu an sawi a. Pu Lianchama Chhangte, Zochhiar Editor-in lawmthu sawiin hun tawp a khar.
Zochhiar Editor hi Pu Lianchama Chhangte niin Changdam Editor hi Pi Sangmawii Chhakchhuak a ni a. An nupa hian Lunglei District MJA-ah nihna pawimawh tak tak an lo chelh fo thin tawh a ni.
Post a Comment