ZOLENTU MAGAZINE CHAMPHAIAH TLANGZARH A NI - TIMES OF MIZORAM

Breaking

Home Top Ad

Post Top Ad

ZOLENTU MAGAZINE CHAMPHAIAH TLANGZARH A NI

ZOLENTU MAGAZINEChamphai Academy of Letters (CAL) te buatsaih Magazine thla thum dana chhuak tur ‘Zolentu’ tih chu vawiin chawhnu khan Er. Lalrammawia, SE, PHED Champhai chuan I&PR Auditorium, CHANEM Building, Champhaiah a tlangzarh.

Er Lalrammawia chuan thil tha ti tura Zolentu Magazine Editorial Board-te huaisen taka an rawn penchhuak ngam chu lawmawm a tih thu a sawi a. An kalzelna turah harsatna awm chang a awm dawn thu leh chungte chu zam hauh lova paltlang thei tura inpuahchah thin turin a chah a. Awmze neia ziak leh chhiar uar thar leh a tul thu sawiin, kan thil chhiar te chu ngaihtuah zuia vawng tlat angai a ni , a ti a. Mahni duh dan ang anga zel din mai lovin a ziaktu rilru leh tum tak zawk hriat tum thin turin a chah a. Miropui leh hlawhtlingten an irawm chhuak ngei hmanga finna leh thiamna thil ziaka an dahte chu chhiar tam thin a tul thu leh finna leh inrintawkna min petu anih thu a sawi a. Ziaka thil tha dah chu thil tangkai tak nakin zel pawha min kaihruai theitu a ni, a ti a. Social media kan hman nasat tak lutuk avanga lehkhabu chhiar kan thlauhthla ta chu pawi a tih thu a sawi a. 


Zirna leh thiamna kawnga Champhai thalaite an thanharh a hun tak zet thu a sawi a. Nakin lawka ram inrelbawlna fawng vuantu ni thei turin tum bulbal tak neia rilru siam angaih thu a sawi a. Ruihhlo leh mipat hmeichhiatna hman sual laka fihlim thei tura zirtirna uar leh zuala kalpui chu thil pawimawh tak anih thu a sawi a. Champhai Academy of Letters (CAL)  chu an thil tih chawinung zel a, tan la sauh sauh turin a fuih a. Zolentu magazine chu zirlaite kawng kawhhmuhtu leh Champhai tana tangkai tak ni ngei thei tura duhsakna hlanin a duh apiangte tana lei theih turin a tlangzarh a ni. 

Magazine tlangzarhna programme hi Pu C.Lalmuansanga, President, CAL chuan a kaihruai a. Rev Lalnunmawia Pachuauin hunserh a hmanga. CAL chungchang report Pu Lalsiammawia Sailo, Asst Secretary, CAL-in a pe a. Pu B.Vanlalchenpuia, Editor, Zolentu Magazine hnen atangin Magazine chungchang report ngaihthlak a ni bawk. Pu RL Chhuanawma, Associate Professor, Govt. Champhai College-in magazine thlirlawkna a nei a. Pu C.Ramengmawia, Vice President, CAL-in lawmthu sawina neiin hun a khar a ni.

Champhai Academy of Letters (CAL) hi April ni 11, 2017 khan din thar leh a ni a. Thu leh hlaa Champhaiin hma a sawn theihna atan theihtawpin hma an la a ni.-DIPR

No comments:

Post a Comment

Post Bottom Ad