~David Sailo


1. INKHAWM KAL TUR -

Kohhran chanchinbu an en phawt loh leh 'Tu thusawi nge?' tiin chhungkua an in zawt hmasa phawt a, thusawitu a zirin an phurin an phur lo thin. Dar rik hi insiam țanna atan an hmang a, muangchang takin tlai hlau takin an kal thin. Sunday chuan nalh tih ngai lovin nalh an inti em em vek a ni. A vuakveta phusa ho chu kal hma mahse a chhung an lut tha peih lova, Sound Control na bul vel leh tlar hnung lamah chhuak zeuh zeuh pah turin an inring ran thin a, Biak In kawt velah an thep kawi reng thin.

2.
CHAIRMAN/HRUAITU -

Țan a hunin inti zei takin engmah sawi pawh awm lovin inla khunkhan takin Sam a rawn chhiar nghal tawp a, a biak Pathian aia mipui zah zawkin "Tawite in kan tawngtai ange" te an ti mai mai thin. Inkhawm vawn urhsun an tum thei hle a, Bible chang sei tak an chhiar ngai lo a, "Halleluia,Amen" an ti ve vak ngai lo. Hmang tawi fel thiam a piang chu Kohhran mite fak hlawhna tih an hria a, Pathian aiin mipui mitmei an veng lian zawk. An chhungkuaa chhung inkhawm an hman dan nen chuan an tawngkam pawh danglam tak a ni. Heng hi lem channa vek a ni. An tawngkamah chuan inkawm hona leh chhungkuaa an hman ngai loh 'Kan hotu ten' tih a 'ten' tih hi an thluk kuai ngauh thin. Thusawitu kutah hun an hlan hnu chuan mi tam zawk hi an țhutna ah thu ila kan zah dawn nen Chairman chuan urhsun a tum tehreng nen mipui tam tak hmachhawn zawngin a muthlu ngawih ngawih bawk thin. A zahtheih loh thlak nge a chak loh thlak zawk. A hnaivai ber pawn Sermon a ngaithla peih bik chuang lo !!

3. THU SAWITU -


An hun neih dawn an hriat atang hian an inbuatsaih nghal mai ngailo deuh vek. An thusawi hun hma ni 2 vel atangin an rilru a luah tan a, thusawi tur aiin an thusawi hunin an thinlung a luahkhat hneh zawk. Èšhingthi, Bawkkhupa chunglam rawn ai chuan Bible Commentary lam an belbul chawt a, chunglam atanga thusawi tur lo thleng a awm lova, lehkhabu atangin an zawng chawp thin. Pulpit an lawn zing tawh a, vawikhat tlingtlak ve mai na tur chu an haih chham bik lo. An thusawi erawh nung hluah hluah, mi thinlunga cham reng tura hnutchhiah tur erawh a awm ngai lo thung. Sana an en sek a, an dawn angte sawi zawh ai chuan inkhawm ban hun pangngaia ban loh hi an hlauh ber a ni. Zaipawl hla rem an awm chuan 'Hla min neih sak turin ka sawm a' te an ti mai mai thin. Zaipawlte chuan Pathian an fak tawh lova thusawitu sawm angin hla an neih sak zawk a nih chu !! Ziaksa en mai tur Note bu an pharh a, mipui lam an hawi leh an Note bu thlir a in zat vel chiah thin. Bible chang an chhinchhiah, a kara Bookmark an zeh hi tla bo palh se buai em em tur khawpa thusawi tur mahni pawh bel lo an tam mai. An thusawiah chuan Thlarau lam thil aiin khawvel Knowlege engemaw zeh an ching a, miten chhiar zau leh hria min ti se tih rilru pu in Bible a chuang lem lo, Commentary a mi an sawi chhuak fo bawk.An thusawi zo Pulpit atanga lo chhuk chu Upa tlar ho chuan lo nghakin Sermon chhung zawnga muhil te pawh chuan phungthlu taka chibaiin 'I sawi tha hle mai' an ti tliar tliar a, hei pawh hi lemchanna vek a ni. Chunglamin a hmu vek a, a Sermon chu sawichhawn tur an hre ngai lo.

4. ÈšHUTNA -

Upa leh hruaitu deuh chu Pulpit veilam sir ah an thu tlangpui a, a thenin bawp an khawkherh a, a thenin thutthleng nghenchhan an hlam duai a, a then dak vahin an muthlu ang phuau a,a then a kun zawngin bu leh dawrh thin khawpin an muthlu bawk. A thenin ke khawkherhin an thluang duai bawk thin. A muthlu lo chhun tlemte te chuan Note bu ah eng eng emaw an ziak a, Sermon lam hawi an lo ziak ngai mang lo. A thenin Kohhran lam chanchinbu an bih bawk a. Thusawitu en dauh dauh Upa hmuh tur an vang hle. Nau țap an awmin an mitin an zawng deuh ruai a, chhangchhe tan chuan inthlahrun awm tak a ni. Sound a kiu leh a chian loh in Sound Control na lam an hawi țhup a, a then chu an meng thip thei hle. Inkhawm ban chuan Biak In chhungah lehkha pawimawh, chanchinbu, Envelope an sem nuai nuai thin. Ringlo mite Biak In chhung zia pawh kan tluk love.


Pulpit vei lamah chuan Nu ho tlawngawl deuh, hruaitu chanchang leh Upa nupuite an thu hlawm a, inti changkang deuh chuan tui an pai a, an in sek thin. A changkang chin hi an lam dawrh dawrh meuh lova, tlema hnuaihnung zawk nu te hi lam peih tak an ni zawk. Hla chang ring takin sawi mahse an bengkhawn lo tih hriatna chu Hla bu an keng reng tho thin. In la changkang nu ho hian kut an beng ri ve vak vak lova, a hmingin an hnawih ve taih taih thin. An muthlu nge mitchhing satliah hriat an har hle. An bulah chuan inkhawm Bag nalh tak tak an hung a, an in elna ve ber pakhat a ni.

Mipui thutna velamah chuan pa ho an thu tlangpui a, thusawi rei an ngaithei lo tlangpui. An zingah hian Upa la nih chhoh ve inbeisei deuh chu tlar hma deuh ah an thu a, inkhawm ban pahin Upa tu emaw ber bekbawrin an chhuah rualpui thin. Khiangkawi ipte hi a dar bat zawngin an ak ve thung thin.

Tlar laia thalai thute chu an muthlu nasa thei hle a, Bible,Hlabu phena Phone khawih char char leh tawngtai laia men ching an tam hle. An Bible karah chuan Sachin, Lawngpar etc an zep mai mai a, an ei zauh zauh thin. Zaipawl zai nilo inkhawm zai pangngai ah chuan an zai țang tha peih miah lo. An hawi kual peih hle a, thusawi tha aiin thusawi sual leh nuihzatthlak chetchhiatna an chhinchhiah thei hle thung.

Dinglama nu ho hi inkhawm taima ber an ni a, Nilai zan pawhin an tam ber zel. Sermon laia Amen Hallelui rawn pe thin hi hemi te tlar atang hian a ni thin. A hnunglamah chhangchhe ho an thukhawm deuh thin a, an luh leh chhuah a in zat thuak thin. Veranda ah chuan nauawm nu ho an awm phung bawk thin. Sunday bak inkhawm hman ve lova insawi nu buai tak tak ten he tlar hi an ti khat tha thin hle a, Sunday bak hman lo te hi Sunday chawhnu leh zan an inkhawm peih ngai chuang lo.


5. INKHAWM BANG -

Inkhawm bang chu an chhuak diah diah a, tih tur hlen leh tlingtla hmel an pu thin. Kawngkhar pelh atangin an in fiam a, an in beng thawr thawr a, kuhva,Sahdah tuibur leh zial chak tawh ho chu an indil tliar tliar thin. Biak In kawt hi kawngpui a ni duh hle a, lirthei kal an zah lo hle a, an kian tha duh ngai lo. Inah an haw a, an inkhawm kha an thenga thawngah a thawk lo tih hriatna chu an sawi chhawn berah 'Awi ka mut chhuah zia chu' 'A lum zia kha' 'Thusawitu khan mut a ti chhuak' 'Chumi/khami kawr hak kha' tih vel hi a ni tlangpui...

Post a Comment

Powered by Blogger.