MNF president Zoramthanga chuan, tun hnaia Chawngte-a a kal ṭuma banner 'Vibrant Chakma Nation' tih an târ chu MNF hmunpui lamin an tihtir a ni lo a, Chakma MNF-te'n an duhthua an tàr mai niin a sawi.

MNF thuchhuah tarlan danin, nimina Mizo Hnam Runa MNF leh Zoram Decentralisation Front (ZDF) hotu­te'n joint meeting an neihah meeting kaihruaitu MNF president Zoramthanga'n thu a sawi a, "Chawngte-a ka kal a, thu an lo ziah poster-a 'Chakma Nation' tih an lo tàr, tute'n emaw a thangchhe zawngin Zoram mipui hriatah sawi belhbawm an lo tum hi pawi ka ti a, kha kha tár rawh u kan tih pawh a ni lo a, anmahni duhthua lo târ ve mai an ni," a ti.

MNF leh ZDF joint meeting-ah hian MNF elected office bearer panga leh ZDF hruaitu mi pasarih an tel a; coordination siam a, member panga ve ve awm chungchang, an thil tumte Mizoram mipui hriata puan chhuah leh zin chhuah programme siam chungchangte an rêl a ni.

Zoramthanga MNFMeeting hian MNF leh ZDF thawh­hona atan Coordination an siam a, MNF treasurer Vanlalzawma chu chairman atan an thlang a; member atan MNF aṭangin general secetary pahnih C Lalrammawia leh Lalchhandama Ralte te bakah, mi dang pathum an ruat dawn a, ZDF aṭangin mi panga an ruat dawn bawk a ni.

Meeting-ah hian ZDF hruaitu Rev. Liandawla chuan, MNF sorkar theih nan theihtawpin an bei dawn tih a sawi a, "Candidate nih tum pakhat pawh kan zingah kan awm ve lo a, coordination siam fel thuaia Zoram pum fan chhuah thuai kan tum," a ti.-VANGLAINI

Post a comment

Powered by Blogger.