Ṭhazual Award 2017-a 'Best Female Artist' atana thlan H.Vanlalhlimpuii (Hlimhlimi) chuan music video, 'Ṭhianrinawm' tih chu a peih fel ta a, zanin dar 6:45-ah Zonet Zawlbuk-ah tichhuah a ni ang. 
Hlimhlimi music video thar 'Ṭhian rinawm'


Hlimhlimi hian kuminah music video a la tichhuak lo a, 'Ṭhian rinawm' tih hi a hmasa ber tur a ni. He hla hi sap hla aṭanga ama lehlin niin, ṭhian rinawm hlut zia tarlanna lam hla a ni. Video hi MDM library-ah dahluh niin, Zonet local channel lamah en tur a awm chho dawn a ni. 

Hlimhlimi chuan, "Hringnunah chuan harsatna leh manganna tawh chang a awm ṭhin a, chung hunah chuan ṭhian rinawm an pawimawh tak zet. Kan chunga thil thleng tam tak hi chhungten min hriatpui loh leh ṭhiante bulah pawh kan sawi chhuah lem loh tam tam tak a awm. Chung hunah chuan ṭhian rinawm chuan kan nun dan aṭangin harsana kan nei tih an hria a, min ṭanpui vat ṭhin" tiin, a hla chungchang a sawi. 

Armed Veng South nula chuan, amah ngei pawhin heting thil hi a lo tawng tawh tih sawiin, tuna a music video pawh hi a ngaihlu hle tih a sawi. He hla hi Miss Mizoram Grand Finale zan khan a lo sa tawh a, tunah chuan a music video en tur a awm dawn ta a ni. 

Music hi Lal K Sailo siam a ni a, recording hi Kings & Prophet-ah tih a ni. Music video hi Andrew Lalbiaknunga siam sak a ni a, Pachhunga University College leh Mualpuiah te shooting hi neih a ni. Video-ah hian Mizo Dance Camp-te lam hmuh tur a awm bawk a, mit leh beng a tlai dawn hle a ni. 

B.A result nghak mek Hlimhlimi hian music lamah hmachhawp eng emaw zat a nei a, hla thar pawh a tichhuak leh mai thei. Hla record sa, shooting neia tihchhuah mai theih tur pawh a nei. Hla lehlin pawh a tithei fu a, 'Ṭhian rinawm' tih loh, hla dang lehlin sa pawh a la nei cheu bawk. -Vanglaini

Post a comment

Powered by Blogger.