International Nurses Day pualin vawiin khan Synod Hospital Durtlang Auditorium-ah inkhawm buatsaih a ni a, Health Minister Pu Lal Thanzaran a hmanpui a.
Pu Lal Thanzara chuan nurse-te chu Florence Nightingale anga hna thawk a, a inpek anga inpe thar turin a chah a. Damlo leh anmahni awmpuitu an chhungte chunga tawngkam hman leh biak danin nasa takin damloteah damna leh nat zualna a thlen thei a ni tih hre reng turin kalkhawmte chu a fuih a. Nurse-te chu damlohna, natna, beidawnna leh thihna kara thawk reng an nih avangin rilru lam pawh a nghawng lo theilo a ni a ti a, a eng zawnga thil thlir thiam a, rilru hrisel put tum hram hram tur a ni, a ti.
Mizoramah doctor leh nurse indaihlohna a nasat thu sawiin thingtlang hmun kilkhawra Health Sub-Centre-ahte Nurse ten nasa taka tan an lakna chu lawmawm a tih thu a sawi a. MIMER din phalna an hmuh tawh angin hemi a thawk tur staff nurse 65 leh ward superintendent 31 chu MPSC-in a la fel tawh a, nikum khan GMN School Thingdawl leh ANM School Lawngtlai chu zirlai 20 ve ve la in bul an tan tawh a ni, a ti bawk.
INTERNATIONAL NURSES DAY MIZORAM
Trained Nurses Association of India (TNAI) Mizoram Branch President, Pi Lalremmawii chuan thu sawiin Nurses Day-ah hian inpekna thar nen tan lak ni se a ti a. Kan thiamnate tibelhchhahin lainatna nen damlote kan enkawl tur a ni tiin thingtlang kilkhawr thlenga thawk thei tura kan inbuatsaih a ngai a ni, a ti a. Nurse hna chu phur leh hlim taka thawk zel turin kalkhawmte chu a fuih bawk a ni.
Programme hi TNAI, Mizoram Branch buatsaih niin Nursing hnathawk mekte leh pension tawhte, Nursing college hrang hrang zirlai leh zirtirtute an tel a ni. International Nurses Day hi Florence Nightingale pian champha May Ni 12-a hman thin a ni.-AIR Aizawl
Post a Comment