ZPM Chief Ministerial Candidate Pu Lalduhawma chuan Citizenship Amendment Bill, 2016 chungchangah State hrang hrang ten an duh loh thu nasa taka an tlangau tawh laiin, tunthengin Congress leh MNF Party-ten anmahni pualin Memorundum pawh an la thehlut ve lova a hriat thu leh he Bill leh Chakma Foreigner chungchang hi thil inkungkaih tlat a nih avangin, heng party pahnihte hian, Chakma vote an hmuhna tur a nih phawt chuan, an ram, an hnam leh an sakhuate ral zawk mahse an pawiti lo nia a ngaih thu a sawi.

Pu Lalduhawma hian vawiin khan ZPM Office-ah thusawiin, 'Citizenship Amendment Bill 2016 hi Parliament-in a pass vaih chuan, Budhist leh Hindu ni ve lo ho chu rei loteah chimral an la ni mai dawn a, Mizoram chhungah Chakma ho an lo lut hum hum thei tawh dawn a ni tih chu hriat sa a ni, a ti a. Tunah hian Chakma Pawl din thar Jonow Shongaty Somiti JSS chuan Chakma District Council huamchhung leh Chittagong Hill Tracts chu Chakma rama siam tumin, Independent an sual mek a. Chuvangin, he Bill hi a bik takin Mizote tan a hlauhawm ber a, thawm pawh neih rin ber tur a ni, a ti.

Inthlan Pu Lalduhawma chuan he Bill hi pass lo tur leh, pass a nih pawhin Mizoram chu huaptir lo turin nikum khan, Pu Lalhmangaiha nen Party President an nihna angin memorandum JPC Chairman hnenah an thehlut tawh tih a sawi a, NGO Co-Ordination Committee pawhin nikum vek khan Delhi-ah Joint Secretary, JPC Pi Kalpana Sharma hnenah Memorundum an thehlut bawk tih a sawi. 

Hetihlai hian, Rajya Sabha MP Pu Ronald Sapa Tlau chuan Citizenship Ammendment Bill 2016 chungchangah JPC on Citizenship Ammendment Bill 2016 Chairman hnenah thutlukna an siam hma in Mizoram leh he bill in a nghawng tur India hmarchhak state te tlawh turin a ngen a, a ngenna hi thawhlehni khan ziaka thleniin, he thil chungchangah hian Assam chu vawi 2 an tlawh tawh laia, a nghawng natna hmarchhak state dang a tlawh lo chu an vui thu a sawi a, heng state ho tlawh lova thutlukna an siam mai chuan a chhe zawngin na takin nghawng a nei anga helna hial a thlen a hlauhthawn thu a hrilh a ni.-AIR Aizawl


Post a comment

Powered by Blogger.