Vawiin khan Lunglei DC Dr Ankita Chakravarty, IAS chuan a office chamber-ah Tawipui 'S' Joint Action Committee (JAC) hruaitute a kawm. He meeting-ah hian Lunglei Additional SP, SDPO, SDC leh School Education Department hruaitute an tel.

Tawipui 'S' High School Headmaster transfer tak sawn let leh an ngenna leh an thil phut dangte Sawrkar hnena an thlen chu tih hlawhtlin theih ala nih loh avangin Tawipui S JAC te hian  Date 8th-9th May 2018 hun chhungin Total Bandh huaihawt an tum.

Dr Ankita Chakravarty chuan Tawipui 'S' khawtlang mamawh leh harsatna te sawrkarin a hriat sak a, amah ngeiin School Education Department hotute leh Sawrkar hotu dangte hemi chungchanga hmalaknate a sawipui tawh thu a tarlang a. Tawipui 'S' High School-a Headmaster dah turin sawrkarin theihtawpin hma a la mek a ni, a ti.Total Bandh huaihawt anih chuan Lunglei District mai bakah Lawngtlai District leh Siaha District mipuiten harsatna tam tak an tawk dawn a ni tiin Lunglei DC chuan Tawipui 'S' JAC te chu Total Bandh huaihawt an tum chu thulh turin a ngen a ni.

Tawipui 'S' JAC-te hian an hmalak zel dan tur sawiho turin zaninah committee an neih tur thu Lunglei DC an hrilh. Total Bandh hi kalpui anih chuan naktuk 8th May, 2018 zing dar 5 atanga chhiarin darkar 48 hun chhung a awh ang.-DIPR

Post a Comment

Powered by Blogger.