Singer Mimi Renthlei leh Mark Lalthanliana te chuan fanu an nei a. March 26, 2018 Aizawl Hospital-ah Mimi hian fanu a nei. An fa hmasa ber hi a pian tirhin Kg 3.5-a rit a ni.
Mimi te nupa hian, an fa hming koh hi — Martha Lawmsangi Varte — tiin a hming an sa.
Mimi leh Mark-a te hi hun eng emaw chen an inngaihzawn hnuah, May ni 6, 2011 khan Mission Veng Biak Inpuiah, chawhnu dar 1:30 khan an inkutsuih a, chawhnu dar 2:30 ah Pi Zaii Hall, Synod Conference Centre-ah Joint Reception an nei zui a nih kha.
Kum ruk (6) zen zawn an inneih hnuah, Mimi Renthlei leh Mark Lalthanliana te tan chanchin lawmawm lehzual an rawn nei ve ta a. An inneih tan tir lamah khan, Lunglen magazine in Mimi Renthlei an interview tumin, mi beisei aia fa an neih lawk loh avanga a nazawng-in zawhna ho mai mai leh, thurawn holam tak tak an pek thin thu bakah, an nupa tana rilru hnual rawih thei tur khawpin mi thenkhatin fiam an ching niin a lo sawi tawh a. He’ng zawng zawngte hi paltlangin, tunah chuan fanu hmangin an chhang let ve ta a, an lawmpuiawm hle.
June ni 8, 2007 khan Mimi Renthlei hian a debut album — Lunglen — tia title a vuah chu Vana pa Hall-ah a release a. A hunlaia album hlawhtling pawl a tling phak a. Album sales pawh a tha hle.
Hun rei tak album lam hawi hlei thei loa a awm hnuin, Rebecca Saimawii thutthleng luah-in Mizo Idol judge a ni a. Hemi hnuah a album pahnih tur buaipui chho velehin, October ni 11, 2016 zanah sawm bik mi tlemte nen Floria Glamour Banquet Hall-ah K. Sapdanga’n a tlangzarh a. A album title chu — Run Rem Ang Aw — tih a ni. He album-ah hian hla 13 zet a awm a, music video siam loin, audio vekin album track a dah a ni.
C. Sanga nena an duet, a album track zing a mi — Runhmun Len I Rel Ang Aw — tih phei hi chu YouTube-ah dah a ni a, tunhnaiah ngaihthlak a hlawhin, viewers pawh a ngah tawh hle.
Source:Lunglen Magazine
Post a Comment