WOD India qualifier-a tel tur hian Zo Nation hi online audition kal tlangin Mizoram bakah, North East Region aiawh tur a thlan chhuah niin, Madras Music Theatre-a ram chhung hmun hrang hrang atanga lam thiam inel zingah an tel a ni. Zo Nation hi India aiawh turin tling zo ta lo mah se, an vawi khat telnaah kut ruakin an lo haw lo.
Best Costume atan thlan an ni a, an kawr hi a var leh Mizo puan inchawhpawlh niin, Vakiria kutchhuak a ni. Chennai-ah hian Zo Nation hi an che ṭha hle a, WOD-a an vawi khat telnah hian hnam dang zingah pawh an zahpuiawm loh zia an pholang. An tel satliah a ni lo a, Mizoram hming an tihṭhat bakah, hmarchhak aṭanga tel thei awmchhuan an ni bawk.
Best Costume atana thlan an ni hi hlawhtlinna a tling a, Chennai lama Zo hnathlak awmte pawhin an ṭawiawm ṭha hle a ni.
Intihsiak chu
World of Dance-ah hian division hrang hrang awmin, team division bakah junior leh singles division-te a awm. Team division hi ngaih hlut ber niin, Zo Nation-te pawh hi he category-ah hian an tel a ni. He division bikah hian online audition kaltlangin India ram hmun hrang hrang aṭangin crew 17 thlan chhuah an ni a, an ni hian intihsiak hi an hmachhawn ta a ni.
A pumpuia pakhatna chu OPM Crew, Chennai niin, an ni hian Los Angeles, California-a World Final neih turah India ai an awh dawn a ni.
World of Dance
American reality competition series World of Dance (WOD) hi kum 2008 khan USA-ah din a ni a, khawvel huapa lam ṭhiam ber ber te tualchaina a ni. Jenna Dewan chu host niin, judge pwn an hrawl hle a, Jennifer Lopez, Ne-Yo leh Derek Hough te an ni nawk. Jennifer Lopez hi executive producer a ni bawk.
Ram hrang hrang aṭanga lam ṭhiam kei kani inti chin fuankhawmnaah hian sum pawh a tam hle a ni. India aṭang pawhin hlawhtlina chang an lo awm tawh a, Desi Hoppers, Mumbai te chu kum 2015 khan Los Angeles-ah World Champion an lo ni tawh a ni.
WOD-a inlan tur thlanna hi India bikah chuan nikum aṭang khan mumal taka kalpui niin, khawpui lian Chennai leh Mumbai-ah te neih a ni tawh.
Mizo Dance Camp
MDC hian hnuhma ṭah tak tak an lo hnutchhiah tawh a, tun ṭuma fehchhuak Zo Nation pawh hi an hnuaia mi a ni. Zo Nation-ah hian member pariat an awm mek a, MDC creative director Alan Rinawma chuan a kaihhruai a ni.
MDC hian June 4 aṭang hian summer intensive an ṭan leh dawn a, thla khat chhung a awh ang. He hunah hian dance class bakah, showcase, showdown jam leh team audition an buatsaih leh dawn a ni. Mizoram pawn thlenga inphochhuak turin hma an la mek bawk.
Mizo Dance Camp ten 'Despacito' an cover chu YouTube lamah pawh entu an tam hle a, Mizo video siam tawhah chuan entu ngah ber a ni hial. -Vanglaini
Post a Comment