MIZORAM BIDS ADIEU To GUV NIRBHAY SHARMAGovernor kalchhuak ta Lt Gen Nirbhay Sharma chuan, Chakma Autonomous Dist Council chuan a bika ngaihven a mamawh a ti.

Mipuite thlahna thu a sawiah Governor chuan, Ziak leh chhiar thiamah Mizoram chu zaa 90 aia sangah a awm laiin Chakma Area bik chuan zaa 50 takngial pawh a phalo tih sawiin Autonomous Dist Council inrelbawl danah pawh dik tawk lo a awm a, tun atanga hun reiloteah midangte than ruala an than ve theih nan felhlelte hi chhui chhuah zel ni se a ti a ni.

Mizo zinga ziak leh chhiar thiam tam chu eizawnna atana hmang turin education leh skill development kalphung ennawn chu hmachhawp pakhat a ni a ti a, tunah hian ziak leh chhiar thiam zat chu zaa 91.33 ni mahse eizawnna hmu chu zaa 24 chauh an ni a, a inkar zau lutuk hnawh khat tturin Human Resource Development Policy rualkhai leh changkang, education leh skill development huam tel a ngai a ni a ti.



Nimina a hun tawp ta, Lt Gen Nirbhay Sharma hi nimin khan Chief Minister Pu Lal Thanhawla, Speaker Pu Hiphei, Cabinet Minister te, Deputy Speaker leh sawrkar hotu pawimawh thenkhatte’n a chenna inah an thlah a.

Pu Nirbhay Sharma-a chuan Mizorama awm chu nuama tih thu sawiin kum thum liam ta chhunga a hun hman danah a lungawi a ni a ti a, thil tam tak a zir hman thu leh Mizoramin hma a sawn theih nana theihtawp a chhuah thin thu a sawi. Engtikah emaw chuan Mizoram chu ral venbuk satliah niloin, Asia Chhimchhak khawmualpui leh a piah lam thlenga India kawtchhuah a nih ngei a beisei thu a sawi bawk. Nimin chawhma vek khan Mizoram Ex-Service League-in Governor hi an thlah a, ngaihhruina thilpekte an hlan a, Governor chuan Mizoramah ruihhlo do turte,mipui hriselna atana hma la tur leh midangte Hindi zirtir turin anni aia pawl chak an awm loh thu lo hrilhin khawtlang tana tha taka thawh chhunzawm zel turin duhsakna a hlan a ni. Chief Minister, Cabinet Minister-te, Deputy Speaker leh sawrkar hotuten Mizoram Governor hi Raj Bhavan atangin Thuampui Helipad thleng an thlah a. 1st Bn. MAP leh 3rd Bn. MAP te’n Guard of Honour nen an thlah liam a ni. -AIR News Aizawl

Post a comment

Powered by Blogger.