Chalfilh Group YMA chuan Tuirini lei chim avanga Darlawn tlangdung in harsatna an tawh avangin nimin khan hnatlang kovin mi sang chuang an thawk chhuak a ni.
Kan corr thudawn danin, hnatlangah Darlawn Chhimveng, Darlawn Vengpui leh Sailutar mipuite an thawk chhuak a, Chalfilh Group YMA huamchhunga YMA Branch hrang hrangte chuan kar kalta lam khan an huamchhung-ah Tuirini Lei siam mek chhak a Lui daikaina siamna tur lung lakkhawm hna anlo thawk tawh a, lung hi trip 50 vel lakkhawm tawh niin, nimin khan Group YMA huaihawtin hna-tlang pui koh chhunzawm a ni a, hnatlang a thawkchhuak hi mi sang 1 chuang an tling ni a hriat a ni.
Hnatlangte hian lirthei kal lailawkna tur siam hna an thawk ni a thudawn a ni a, hnatlang te hi a tul dan ang angin PWD lam pawhin an puibawk ni a thudawn niin, hetihlai hian ruah a tlak chhunzawm rih loh vangin Tuirini lui hi a lian chhunzawmlo a, hnatlang a thawk-chhuak te pawh hian harsatna lutuk tawklo in lirthei kal kai lailawkna tur siam hna hi an thawk thei niin Tuirini atanga thu-dawnna chuan a sawi.
Hetihlai hian kar kalta khan Mizoram sorkar leh Tuirini lei (Bailey Bridge) siam hna thawk mek SLT infrastructure te chu-an chak zawka hna-thawk turin inremna an ziak a, he an inrem-na ah hian Tuivawl Bialtu MLA RL Pianmawia, Aizawl DC leh Company aiawh-te bakah Group YMA hruaituten hming an ziak ni a hriat a ni a, inremna ziah ang chuan, company lam hian hnathawktu tam zawk an rawih belh ang a, huntiam chhungin hna an zo ngei tur a ni, tih a ni.
Darlawn tlangdung harsatna in ziaawm lam a la pan hleithei lova motor kalkaina tur lei dawh a nih loh bakah mihring kalkaina tur suspension bridge pawh engtikah nge siam tan a nih dawn hriat a ni lo tih Chalfilh Group YMA secretary Ngurthansanga chuan a lo sawi tawh a.
Pu Ngurthansanga chuan Bailey Bridge siamna tur atana cheng Nuai 13 a awm thu leh hna tan mai theih a nih thu assembly session zawh takah khan sawilan ni mahse nimin khan PWD engineer te chuan suspension bridge estimate an la siam ngai loh thu an sawi a ti a. YMA te chu pressure group an ni lova, zawldawh takin ngen mai chu an theih tawk tih sawiin, hetih lai hian an dinhmun chu a manganthlak hle a, engtia hma lak zel tur nge tih pawh hriatthiam a har tawh khawp mai a ti.
Ruahsur-in Tuirini lui a tih len avanga motor-a lui kan theih a nihloh avangin Darlawn khuaah bungraw lakluh a harsa hle a, eirawngbawlna gas pawh man to zawka hralh a ni a. Gas phur motor lian tan Tuirini lui hi kai ngam a ni lova, hei vang hian Darlawn khuaa sem tur gas te chu head load-a lui kan pui a, motor tea Darlawna phurh luh leh an ni a, hei vang hian Sangi Gas Agency chuan VC, YMA leh consumer pawlte phalnain a man to zawkin an hralh a ni.
Darlawn khaw VC te chuan an khuaa nitin mamawh zuartute chu thil ti to ngawt lo turin an hriattir a, mahse tun ang renga motor lian a thlen theih lohva, inhlanchhawn zel a ngaih chuan an sumdawngte lakluhna man an ngaihtuah ve a tul tur thu VC memberte chuan an sawi. Gas manto zawka mipuiin an lei tih bak chu harsatna em em Darlawn hian an la tawk lova, tualchhunga petrol leh thildang an zawrhte pawh a man ngaiin an la hralh thei rih a ni. -AIR News Aizawl
Post a Comment