(Hlawhtlinna thawnthu ka hriat chinah - huaisen taka thutlukna siam pakhat tal a tel ziah)
By - Tetea Hmar
Kan ram zimte ah hian hna indaih lohna avangin thalai hna nei mumal lo kan kat nuk tawh a. Thenkhat zir sang tak tak an nih laiin thenkhat erawh zir sang lem lo an ni a. Zir san ringawt kan tumna lamah kan thiam thil takngial pawh ngaihtuah hman lovin kan zir mawlh mawlh a, a tawpah zir san aiin lehkhathiam nih leh thiam thil neih a hlutzia kan hre thar leh a. Thluak chawmawlh lamah eng eng emaw kan zir kual leh a computer lam kan ti coaching kan ti. Heng zawng zawng kan zir zawh meuh chuan khua a lo tlai tawh thin a, a hnuah inchhirin.awmzia a neih loh thu keini aia naupang zawk te hnenah kan fah mawlh mawlh a mahni tan awmzia a nei tawh thin si lo. Indawmkun ngawih ngawih chungin 'ka lo mawl rei lutuk a ni' tiin kan inchhir thu kan sawi kan sawi a. Awmzia a nei thui tawh thin si lo!
Tun tumah erawh mi nawlpui zir sang leh zir sang lem lo tan hna hmuh awlsam dan kan sawi dawn a ni.
Hna hmu tur hian zir san vak hi a lo ni lem lo va matric passed leh failed tan pawh typing lam hi thiam phawt ila khawvel a changkan tawh avangin a hnuah computer pawh zir dawn ila a awlsam phah hle. Dawr nghak tur emaw manager ang a thu tur pawhin computer thiam kher an duh tawh avangin kan thiam ngei hi chu a ngai. Sawrkar clerk hna thawka luh tum phei chuan a lo berah Minute khatah thumal 30 tal chhut zawh hman a ngai tawh a. Chutiang thiam tan chuan a nghet lo (Muster roll) ang a inhlawhna te pawh a awm ve thei bawk. Department ngawr ngawr 'aim' hran lo ila...kan thiam tawh ber chuan private sector chi hrang hrang ah kan thawh tur tawk tete hi chu a awm ve zel mai a ni. Chumi tur erawh chuan taihmak deuh hlek a ngai ve thung tih erawh hriat a tha. Tin, hetiang zir tura neilo i inti a nih pawhin lungngai suh sawrkar hmalakna a tha tawh a. Kan ramah te ngei pawh zirna tha tak tak ITI te kan nei tawh a thlatin stipend 250/500 te dawngin training theih a ni tawh a. ITI atanga training chhuak phei hi chu Department hrang hrangah an bur fur tawh. Thenkhat phei chu private in dawr te an hawng a, hlawhtlinpui tak takte pawh an kat nuk tawh. Dawr hawn dawn hian thenkhat chu sum lu neih loh vang chhuanlam an awm thin a, mahsela, chu chu chhuanlam a tling lo tih i rilruah dah nghet bur rawh. Keipawh hmanah vawikhat chu vai pakhatin sumdawng turin min ti tawh a chutah chuan pawisa 1200 chiah ka neih thuin ka chhang a... a ni chuan 'I neih ang zat zat khan bul tan tawp rawh bultanna liantham tak i aim chhung chuan engtikahmah bul i tan lo vang' tia min chhan kha ka la hre reng thin. Keini mizo te chuan sum lu hi kan lo chhuanlam mai thin a. A pawimawh ber hi chu a lo ni hran lo.
ITI ngeia training i duh a training tur i hriat loh chuan tlem azawng ka rawn thailang hrim hrim ang a i lo chhinchhiah dawn nia. Matric passed tan - 1) Radio & TV Mechanics 2) Electronics 3) Electrician. 4) Draughtsman (Civil) 5) Stenography (English) leh Matric passed lo tan pawh 1) Motor Mechanics 2) Diesel Mechanics 3) Wireman 4) Carpentary 5) Plumber 6) Welder 7) Cutting & Tailoring 8) Bakery & confectionery leh a dang tam tak pawh a awm ang. A zawng zawng chuan sawi vek kher lo mai ila....a hmunah ngei ngaihven a hmalak vat chi a ni. Chuti lo chu i kum te a lo tam ang a, tlaikhaw hnuah awmzia a nei tawh dawn lo.
Mizo te hi chuan sawrkar hnathawh lam hi kan intihhmuh nasa a, kan ram dinhmun ngaihtuah chuan company, industry liantham kan la nei mumal loh avangin thil ni-awm tak pawh a ni reng a. Mahsela, sawrkar hnathawk tamna ram apiang hi ram changkang lo an ni lawi si avangin kan ram chu India ramah pawh state changkang lo leh intodelhna kawnga hmasawn lo ber te zingah chhiar a ni a. Chuvangin sawrkar hnathawh hi chapopui chi a ni lo tihna a ni.
Mizote'na kan changkan phahna tur nia lang chu heng army, air force, navy angah te hian a tam thei ang ber luh hi niin a lang. Mizo sipai officer tia sawi tur hi kan la nei mang lo va, a hmingin 15-20 bawr vel kan nei ve hram a. State dang nena khaikhin chuan eng tham mah a la ni lo. Hengah te hian indona hmuna kal chi leh kal lo chi thenhran theih a ni a. Mizo te phei hi chu infiamna tithei tak takte pawh kan awm nual a, chutiang tur pawh chuan luh theih a ni.
India ram chhungah state te reuhte intodelh lo leh kil takah kan awm a, a tlangpui thuah chuan changkang nia kan inhriat pawh hian belhchian kan dawl chuang lo. Thil fun/tuam chi Maximum Retail Price aia sanga kan lei chhung chuan state rethei kan ni tihna a ni. Sipai tan hi India ram fan zauna a nih mai bakah, tawng chi hrang hrang thiamna bul a ni Hindi chauh hman thiam pawh changkanna a nih bakah sumdawnna bul tan nan - Delhi, Kolkata, etc dawr nan a tangkai hle. Sipai hi invawn nan a tha a, hunrei atan a tha. Form ha rau rauah police tan aiin (IPS direct a tlin a nih ngawt loh chuan) tlin har deuh zawk mah sela a changkang zawkin hamthatna a tam zawk niin a lang. Mizo tan phei chuan nu leh pate hmuh phak loh vairama fate lehkha zirtir chu a duh awm zawk. 1997 a UPSC Civil Services a tling thenkhatte pawh kha Bombay-a awm Mizo sipai tangte bawk an nih kha. Services rei duh loh pawhin Kum 15 velah duh leh a pension theih. Pension hnuah sawrkar hna hrang hrangah thawh theihna a inhawng lehin anmahni leh an fate chu duhsak bik an ni thin.
Awle, sipai lam chu ka sawi tam ta viau a, ngaihdan i neih thiam pawh ka ring. Lehkhazir i ning a....i chawlhsan dawn a nih chuan Sipaiah luh i lo tum ve ngei dawn nia.
Tunah chuan India ram chhung hmunpui zawk a hna thenkhatte sawi lang dawn ila ; India ram chanchinbu lian leh social network khawih thin i nih chuan Central hnaruak leh private company hnaruak te i hmu fo thin ang a. Hengah te hian keini chuan dil en-ah kan en thin lo va. Thenawm state dangte chuan bawhzui nghal zung zungin hmunpui lamah inbengbelin awmhmun an khuar a....an.hnampui dangten chhawr tangkai zelin Central lamah mi challang tak tak an awm phah thin a ni. Railways angah te pawh hian Matric passed lo tana thawh tur hnaruak an chhuah nual thin a. Keini mizo te hian a tam thei ang ber dil ila kan Mizo pui tam tak zin veivak pawh hi an thlamuan phah ngei ka ring tlat a ni.
A thu hrimin Mizoram pawna hnaruak awm thinte hian Schedule Tribe tana seat Reserved a awm deuh ziah thin a, mahse chung reserved seat hnawh khah lova a awm leh zauh zauh thin hi a pawi hle (hman kum dekha CDS kan ram quota ni si vaiho an luh teuh ang te kha). Mizorama nuaikhat dawn hna hmu lo awm nen phei chuan a intu lo em em a ni, kan intichangkang viau mai bawk si a, insiamthatna tur chu kan la nei a ni. Hnaruak tam tak India sawrkar-in a chhuah thin.,,.Mizo te'na kan la thawh ngai loh a tam zia hre reng chungin lehkha chhiar la HNA CHU I HMU NGEI NGEI ANG tih hi ka chiang a ni.
Post a Comment