David Sailo 20th June

HNATHAWH KAWR -
HNATHAWH KAWR KA HA VE DUHMLA nihna hi hnathawh kawr kan tih ber chu a ni. He kawr hak hi hnathawh kawrah chuan kan chak ber a, mawi leh mawilo, hmingchhiat mualpho huamin hak kan tum dawr dawr mai zawng a nih hi. "Ka nghawngkawl chu a nuam a, ka phur pawh a zâng a ni" tih kha he hnathawh kawr hian a chhawm deuh tlat a lawm.

A DESIGN - 
A țhui hah ber tute chu sakechek te an ni a, puanthan thawhtute leh hnathawk tura hâktirtute chu mipui kan ni. Hnathawh kawr ah chuan buaipuitu tam ber a ni a, a hatu pawhin hnathawk tur tih in hre lo leka hnathawh kawr buaipuitute chunga len mai pawh hi awl tak tur a ni.

HNATHAWH KAWR HÂK KA ZIR VE -
Mi chuan hnathawh kawr an ha a, thlawhhma te, Quarry te, insaknate an pan hnak hnak thin a, he hnathawh kawr hatute chuan an inbel chiah atangin Quarter nuam takah, Car nuam takah, Office nuam takah an tleh zel zel ta mai a.

He kawr haka thawhrim ngai lai ber chu nalh taka tuikhur thar hawn thlenga in penparh a ni mai. Khuarel chhiatna thlengah hnathawh kawr an hakna bial a nih chuan mi thlen hnu ah an thleng a, Tarmit dum nen Silpouline leh hnatlang thingpui inna tur Rs.5000 vel an pe ve a, a har lo. Chhiattawk chhungte tan hian an thlamuanawm vawng vawng lo thin teh e. An hnathawhkawr nalh lutuk ringawt pawh chu an bula awm inthlahrun awm khawp a ni. Khawhar inah chuan chibai remna lai leh hmuh awl deuhna lai tur an thlang thiam hle a, tumah an melh kual ve duh lo thung.

Ka zir zel a, hnathawh kawr hak an dil laia thingtlang khaw tawp thleng tlawha an zin lai khan an iptepui bânna chhungkuate khan chhun pachangah ar talh tur zawngin an phe buai a nih kha. Chu kawr ngei chu an han ha a, an Office leh in lamah chuan thingtlang atang chuan kan inah pawh a thleng tawh tiin an rawn dik dak ve a, kar tluan pawn an hmu thei ta lo.

Mi hmel en loh hrim hrim a chhawm tel a, lehlam hawi paha mi chibai pawh thiam tel a ngai. Hnathawh kawr mak tak chu a lo ni !!

A HNA A HLAWK -
He hnathawh kawrin a hna ken tel hi a hlawk hle a, in nalh tak tak, lirthei manto, sum leh pai vaibelchhe tela chen thuai theihna a ni. Kum 5 chhunga intodelh hman tir min tum a, in tan hna kan thawk e an ti chamchi a, kum 5 chhung chuan AN NI chu an intodelh ta mah mah a, KEINI chuan an duh miah loh hnathawh kawr chhe zawk bawk kan inbel leh thin.

An hna avang hian an pawr ve chip chep lova, hnathawh kawr inbel nitinin kum 5 chhung lekin an mam kang kang a, an pial then a, an mawm deuh hlap tawh thin.

PUTE U, HENG HNATHAWH KAWR IN TIH FO ȚHIN LO DEUH HI IN BEL A VA HUN TAWH EM!!


*Thlalak leh thu hian inzawmna a nei lo.

Post a Comment

Powered by Blogger.