Mizo Footballer Jerry MawihmingthangaChanmari rawlthar Jerry Mawihmingthanga chu Indian rawlthar zinga player ṭha berah a professional player pui ten an thlang.

India rama professional football player intelkhawm pawl Football Players Association of India (FPAI) chuan ṭum danga an tih ṭhin angin Kolkata khawpuiah Thawhlehni zan khan Indian Football Awards chawimawina an sem chhuak a, Jamshedpur FC midfielder Jerry hi Young Player of the year-ah thlan a ni.

Mizoram Premier League Under-17 season-1 a best player atana thlan Jerry hian he chawimawina dawng tur hian Udanta Singh, Jerry Lalrinzuala, Anirudh Thapa leh Lallianzuala Chhangte te a khum.


Hetihlai hian chawimawina ngaihhlut hlawh ber Indian Player of the Year chawimawina chu Sunil Chhetri hnenah hlan a ni a, nikuma he chawimawina dawngtu Jeje Lalpekhlua chu chawimawina dawng thei tura chhawpchhuah zingah tel mah se India captain Chhetri a tluk ta lo a ni.

Jerry a lawm

Chanmari rawlthar Jerry chuan, "Ka player puite ngeiin an thlanchhuah a ni tih hriatna hian minti lawm lehzual a, hetiang chawimawina ropui dawn hi ka lo beisei ngai lo. Engkim hi Pathian vang a ni a, damna leh hriselna ṭha min pe a, ka lawm takzet a ni," tiin Vanglaini a hrilh a, tun dinhmun hruai thlengtu Pathian a theihnghilh lo.

Jerry hian season hman zawh takah khan Indian Super League-ah Jamshedpur FC tan a khel a, Indian football ngainatute ngaihven rawn berah a invawrh chho. Tata Steel club tan hian league match 16 khelin goal khat a khung a, assist vawi thum neiin Emergin Player of the Match-ah vawi nga thlan a ni. Jerry-a goal hi Kerala Blasters laka a khung niin second 22 chiah goal khung turin a mamawh a, ISL-a goal lut rang ber a ni.


DSk Shivajians leh NorthEast United tan pawha lo khel tawh Jerry chuan tun hi a tawpna tur a nih loh thu sawiin, "Engmah ka sawi lawk thei lo a, target pawh a hranpain ka insiam chuang lo. Mahse, nitina hmasawn hi ka duhdan chu a ni a, season hmasa aia ṭha zawk zel nih ka tum a ni," tiin Vanglaini a hrilh.

FPAI Indian Football Awards

Young Player of the year: Jerry Mawihmingthanga, Udanta Singh, Jerry Lalrinzuala, Anirudh Thapa, Lallianzuala Chhangte

Foreign Player of the year: Miku, Ferran Corominas, Chencho Gyeltshen, Marcelinho, Manuel Lanzarote

Coach of the year: Albert Roca, Steve Coppell, Gift Raikhan, Sergio Lobera, Khogen Singh

Fans Player of the year: Subhash Singh, Ubaid CK, Rahul Bheke, Michael Soosairaj, Mandar Rao Desai

*Tih dum bik hi chawimawina dawngtu zel an ni a, a bak zawng hi nominee an ni.

~Vanglaini

Post a comment

Powered by Blogger.