Mizoram Govt. Lumpsum Higher Secondary School dinna khua Pakuaa Managing Board, MIGLAHSSA, Joint Students' Union, Joint Action Committe ten Sawrkarin Adhoc Grant-in-Aid a hlangkai tura an ngennaah Sawrkar hnen atanga thu lawmawm an dawn loh avangin tukin zing Dar 6:00 atang khan an khaw awmnaa zirna in leh sorkar pisa te kharin inkalpawhna kawngpui an dang bawk.
Heng khua te hi Sakawrdai, Farkawn, Zawlnuam, W.Phaileng, Phullen, N.E.Khawdungsei, E.Lungdar, Zobawk, Thingsultliah te a ni a, All NGO atanga duty insiamin Boruak muanawm tak hnuaiah lungawilohna lantir a ni tih kan thudawnna chuan a sawi.
Lungawilohna lantirna hi naktukah chhunzawm an tum a, Thingsulthliah khua chuan an khaw chhung mai ni lovin an Ram chhung Tuirini ah naktuk atang khian kawng an dang tel dawn ni a thudawn a ni.
Lunglei Zobawk Khawtlang chuan vawiin khan Zobawk South leh Zobawk North ah Road Block siamin kawngpui an dang a. Zobawk North leh Zobawk South Village Council bakah Zobawka Tlawmngai Pawl hrang hrang aiawhte telna Joint Action Committee, Zobawk huaihawtin Adhoc Status a Zobawk HSS dah ngiat hian kawngpui hi dan a ni a. Joint Action Commtt.Zobawk Chairman Pu K.Lalrodinga chuan, Sorkar nawr nan hian August ni 3 thleng kawngpui dan an tum thu leh, a hlawhtlin hma chu na zawka hmalak chhunzawm zel an tum thu a sawi. Zobawk hi National Highway 54 tan tlang anih angin Hnahthial, South Vanlaiphai, Darzo leh a chhehvel atanga Lungleia lirthei service thin te leh Zobawk mipui Lungleia class kal thin te leh pisa kai thin te pawhin kawngpui hi an kal tlang theihloh avangin harsatna an tawk chho mek a, lirthei engemawzat chu Zobawk ah hian an tangkhang mek a, buaina leh tharum thawhna lam erawh thleng a awm lo tih kan corr chuan a sawi a ni.
Lumpsum Grant-In-Aid school te harsatna tawh chungchang ah hian Chief Minister Pu Lal Thanhawla chu a chenna in ah MZP hruaitute chuan vawiin khan an hmu a. Lumpsum Grant-In-Aid school ten dinhmun sang zawk a awm an phut avanga an harsatna tawh mek leh zirlai ten zirna an chhunzawm theih loh chungchang sawipui a niin, zirlai thahnem takin an tawrh nasat tawh avanga atul anga ngaihtuah sak tura ngen a ni a. Chief Minister chuan sum harsatna avangin an tihhlawhtlin theih loh thu a lo hrilh a, MZP chuan nimin pawh khan School Education Minister Pu H.Rohluna chu a Pisa-ah an hmu a, Minister chuan tunah sorkarin sum a neih loh avangin an dinhmun hrethiam viau mah se, an phut ang hian sorkar in a ti hlawhtling thei rih lo niin a lo sawi bawk a a ni.
MZP hruaitute hian school education Minister Pu H.Rohluna hnenah Thingtlang lamah zirtirtu an tlem thu leh khawpui lama an tam thu te, zirtirtu Thingtlang leh khawpui lama semrual a ngaih thu te an sawipui a. Minister chuan chungchang hi karthar lama school education department official te leh MZP hruaitute nen document kimchang enho a, sawiho leh ni se ti a rawtna siam a ni.
Govt. Lumpsum Higher Secondary School nuarte chungchangah hian sorkar chuan vawiin khan thuchhuah siamin, Lump sum grant dawng mek school 7l zinga HSS 9 chuan dinhmun tha zawk ngiatin a nuar zawngin tunah hian hma anla mek a. Hei hi School Education Department chuan pawi a ti tak zet a ni a ti.
An thil phut hi sorkar hian lo ti hlawhtling dawn ta pawh ni se anmahni ang tho, mahse nuar ve lo school 62 dangte pawh hi an chungchang ngaihtuah a ngai dawn a ni, a ti a, chuvangin School Education Department chuan Lump sum higher secondary school 9 te dilna hi zirna ngaih pawimawh loh vang ni lovin, tun dinhmuna tihhlawhtlin theih rih lovah a ngai a. Zirlaite hmakhua ngaia an nawrh mek hi titawp thuai turin School Education Department chuan Higher Secondary School 9-a Managing Committee te leh school-a thawktu te hi a ngen a ni a ti. - DIPR
Post a Comment