Mizoram District Fai Inelna - Chanchinthar - TIMES OF MIZORAM

25 Jul 2018

Mizoram District Fai Inelna - Chanchinthar

District fai inelna hmachhawn turin District hrang hrangin hma an la chho mek a. Vawiin khan District pathumah chuan hemi chungchang ngaihtuah hian mi pawimawhte an thukhawm.

UD & PA Department ruahmannaa Fai inelnaa lawmman lak ngei tumin vawiin khan Lawngtlai District Sanitation Task Force chu an Chairman Lawngtlai DC, Pu N.Chakhai hovin DC Conference Hall-ah an thukhawm a. hmalak dan tur hrang hrang duangin, chung zingah chuan khawpui chhunga tuiluankawr leh inkalpawhna kawng te tihfaia siam that ngai lai te a theih ang anga siam that te, mipui tana hnawksak ran In leh In sakna bungrua kawng sira dah te leh Motor hlui hman tlak tawh loh kawng kama awmte thenfai a nih theih nana hma lak te a tel a. Mipui thinlunga Faina leh thianghlimna tuh a nih theih nan uar zawka hma lak tha an ti a; Zirna In leh Kohhran hrang hrangahte he lam hawia hmalakna kalpui nise an ti a, khawlaia ran chhuah khap tha an tih bakah, mumal zawka bawlhhlawh paih a nih theih nan ruahmanna siam ni se, an ti bawk.





Hei bakah hian Swachh Bharat Mission - Grameen hnuaia India ram puma district tin faina kawnga an dinhmun endika an dinhmun siamna tur Swachh Survekshan Grameen 2018 pawh Lawngtlai DC Conference Hall-ah tho hian DC Pu N. Chakhai-a’n a hawng nghal bawk.

Serchhip-ah pawh DC Conference Hall-ah Khawpui Fai Inelna atana beihpui thlakna tur chu DC Pi Sangchhin Chinzah-in a hawng a. DC chuan India rama District Literacy Rate sang ber luahtu Serchhip District hian District fai ber nihna pawh a luah thei ngei ang, a ti a. Nikuma UD&PA buatsaih khawpui fai inelnaah District khawpui 8 zinga Serchhip 6-na a ni chu a tlawm thlak hle a. Nimahsela chumi atanga harchhuak Serchhip mipuiten hma an lakna zarah kumin Swachh Survekshan, Northeast Zone- a khawpui 220 zingah Serchhip chu 23-na niin Mizorama District Capital lang awm chhun a ni ta hial chu a lawmawm hle a ni, DC chuan a ti a. Nikum inelnaa Serchhip khawpui pawthniamtu Serchhip paltlang NH 54-in side drain a nei lo pawh kuminah chuan Serchhipa Officer-te thawhlawm tling khawm leh Sanitation Task Force a\anga hmalakna tur sum hmuh te hmangin side drain laih chhuah vek tum a ni a, a thawh khat nan tun Inrinni lo awm turah khian hnatlang pui koh a ni, NH 54 paltlang Branch YMA te, District Officer zawng zawng te, Serchhipa JCB nei zawng zawng te, lei vung paihna tur chi Truck nei zawng zawngte an hnatlang dawn, DC chuan a ti.





Hnatlan dan tur rel hian vawiin vek khan DC Conference Hall-ah Serchhip District Sanitation Task Force leh Serchhip khawpui chhunga Branch YMA hrang hrang leh Village Council hrang hrang te an thukhawm a ni.

Champhai Town Sanitation Task Force pawh vawiin khan an Chairman DC, Dr. Naveen Aggarwal-a hovin an thukhawm a; Champhai khawpui chhung cheimawina leh faina lama hmalakna tur hmachhawp hrang hrangte an thlirho.

Champhai DC chuan Champhai khawpui cheimawina tura rawtna awmte chu phurawm a tih thu leh a bikin UD&PA Department leh Champhai Nature Conservancy te hmalaknate chu fakawm a tih thu a sawi a. Thingphun belh lama tan lak a pawimawh thu leh Circuit House bula Tlaizawng hmun siam tumna chu tha a tih thu a sawi bawk.





Vawiina Champhai Town Sanitation Task Force thukhawm chuan lui dung tihfai hnatlang thawh leh tha an ti a. Champhai khawpui bik tan khawpui hrula luang Keilungliah lui dung tifaia hnatlan ni se, Khawzawl leh Biate-ah te chuan BDO leh SDO te, VC-te kaihhruaina hnuaiah hnatlan ni se, an ti a. Urban Cleanliness Competition buatsaih tha an ti a; hemi atan hian VC-te kokhawmin rawtna siam ni se, sawrkar Office leh Zirna In te pawh hriattirna pek vek ni se, an ti a. A zau thei ang bera Faina kawnga inzirtirna kalpui turin Capacity Building 
Awareness Campaign and Education, Swachh Bharat Mission official partner Govt. Champhai College nena kalpui dan tur te, Media hmanga puanzar dan tur te leh Generic Banner siam dan turte pawh sawiho a ni bawk.

Vantlang hman theih tur Hnawmbawm lian dah dan tur pawh sawiho a ni a. Kumin bikah Community Bin 230 sem chhuah tum a ni a, Champhaiah 200, Khawzawlah 70, Khawhaiah 30 leh Biate ah 30 te pek chhuah tura ruahman a ni.

(IPR & PTCs)

No comments:

Post a Comment

Post Bottom Ad