TAR CHAWMNA SUM LEH RUALBANLOTE SUM TUR PEK KIM AN LA NI RIH LO - TIMES OF MIZORAM

4 Jul 2018

TAR CHAWMNA SUM LEH RUALBANLOTE SUM TUR PEK KIM AN LA NI RIH LO

NSAP HNUAIA TAR CHAWMNA SUM LEH RUALBANLO TE SUM TUR CENTRAL IN PE TAWH MAHSE A DAWNG TUR TE HNENAH SUM PEK KIM AN LA NI RIH LO

~ K. Lalngaizuala

timesofmizoram newspaperCentral sorkar ah kum 2017-2018 chhungin Mizoram state tana tar chawmna tur sum leh rualbanlo sum tur an rawn pek zah ka zawt a. Tichuan, Ministry of Rural Development, Govt of India in chhanna min pek ah Indira Gandhi National Old Age Pension Schemes (IGNOAP) atan Rs 883.32 lakhs leh Indira Gandhi National Disability Pension Schemes(IGNDPS) atan Rs 14.83 lakhs pek kan ni. Mahse, tun kum 2018-2019 financial year bik atan erawh chhanna min rawn pek thleng hian sum dawn a la ni lo thung. 




Hetih lai hian District Social Welfare Officer (DSWO) Saiha huam chhung Sangau, Tuipang, S. Bungtlang, Siaha, Chawngte leh Saiha Block-a National Social Assistance Programme (NSAP) hnuai atanga tar pension, hmeithai pension leh rualbanlo pension te sum tur central in Mizoram sorkar hnena a rawn pek tawh sem mumal loh nia lang chu enge thil awmzia tiin central lam a hotute hma la thuai turin ngenna ka thlen sak a. Mizoram sorkar Social Welfare Department chu hma la tura tiin, Director Social Welfare Department pawhin telephone a min rawn bia in Letter N0. B. 13012/9/2014-DTE(SW) dt. 21 June 2018 angin ziaka a hnuaia ka rawn tarlan ang hian chhanna min pe bawk.

Heng a chunga ka rawn tarlan huamchhung bik tena harsatna an tawh chhan chu hetiang hi a ni. Kum 2017 hmalam ah chuan tar pension, hmeithai pension leh rualbanlo pension te hi Autonomous District Council hnuaia awm te chu anmahni district council theuh ah sum transfer thin niin sum faia pek thin an ni. 




Amaherawhchu, Govt of India in Direct Benefit Transfer hmanga ti tawh tura a rawn tih avangin heng tanpuina dawng thin tu (beneficiaries) te chu bank ah account hawng vek tura tih an ni. Tha takin sum an dawng nia hriat a nih laiin thenkhat ten dawng lovin, thenkhat thung te erawh an account a pawisa lut double te a awm thung. Hetiang a nih avang hian department leh bank lam hotuten a chinfel hna theih tawp an chhuah mek a, chinfel a nih hma chuan pawisa an thun chhunzawm rih lo mai a ni. 

Tichuan, kum 2018 March thlenga an sum lak loh zawng zawng te hi account chianglo te chinfel a nih hnuah thun sak leh an ni ang. Heng National Social Assistance Programme(NSAP) hnuaia pension la zawng zawngte dawhthei taka lo nghak hram hram turin an ngen bawk tiin ziaka chhanna pek ka ni. Tichuan, Sangau, Tuipang, S. Bungtlang, Siaha, Chawngte leh Saiha Block huamchhunga NSAP hnuai atanga pension la zawng zawng ten tun atanga reilote chhungin in pension sum in hmuh thuai theih nan duhsakna sang ber ka hlan a che u. 

No comments:

Post a Comment

Post Bottom Ad