NEDP sum Cheng Nuai 571 senna tur, Mat lui Chawmkai-a thir lei dawh tur lungphum chu nimin khan Chief Minister Pu Lal Thanhawla’n a phum.
Chief Minister chuan he lei hi dawh zawh a nih chuan, Mat lui ral lehlama loneitute, fur tuilian avanga lirthei kal tlang thei lo ten harsatna an tawh te a sukiang dawn a. Kut hnathawktu chhungkaw 300 chuang te tan bakah Chhipphir leh Zote South khua te tan a tangkai hle dawn a ni, a ti. An party chuan a hun lai mil zelin policy a duang thin tih sawiin Chief Minister chuan rambuai reh nan remna leh muanna kalpuiin chumi hnuah rangva sem buaipui lehin tunah chuan kuthnathawktute lam hawi NLUP leh a nawrzuina NEDP a kalpui leh a, tluang takin a kal mek a ni, a ti a. India ram state 29 zinga GSDP tha state 5 zingah Mizoram a tel thu sawi nawn lehin, Mizoram sorkarin power-a intodelh tura hma a lakna te a sawi a. Power-a inrenchem nan sorkar office tinah solar plate daha hman theiha siam tum a nih thu a sawi bawk.
Nimina report petu PWD SE Pu Vanlalchhuana sawi dan chuan Lei hi feet 180 a thui, feet 9.10 a zau tura ruahman a ni a. A dawl zawh chin chu 24R IRC Loading Class niin, a lei chhuat hi tuifinriat zawl atanga teha metre 381.467-a sang an i ang a, chu chu fur tui chim sân lai ber aiin metre 2-in a sang a ni. Tunah hian hna thawk tur online-in quotation koh mek a ni a, hna pum pui hi thla 18 chhunga thawh zawh tura beisei a ni a. Mizorama Galvanized Bailey Bridge hmasa ber tur a ni.
(PTC Serchhip)
Post a Comment