MIZORAM INTERNATIONAL SHORT FILM FESTIVAL CONCLUDES

GOVERNOR-IN MIZORAM INTERNATIONAL SHORT FILM FESTIVAL KHARNA HMANPUI

Mizoram International Short Film Festival (MISFF), Innovations India in NEDP bultuma I&PR Department kaltlanga a buatsaih chu vawiin chawhma khan Aijal Club-ah a kharna neih a ni a. Mizoram Governor Pu Kummanam Rajasekharan chuan he film festival-a film siamtu thlanchhuah te hnenah lawmman a sem a ni.

Pu Kummanam Rajasekharan chuan he hunah hian thu sawiin, film chu khawtlang tana hmanraw pawimawh tak, zirtirna tha min petu leh khawtlang siamtha tura ngaihtuahna thar min neihtir thintu a ni, a ti a. Mizote chu an themthiamin, hnamzia pholang thei thil te (art forms) nen pawh inzawmna thui tak an nei a ni, a ti. Mizoram leilung mawina te sawiin, film siamtute hip thei tur khawpa a mawi thu a sawi a. Mizoram chu film siamtute fuankhawmna hmun ni thei se tiin a duh thu a sawi a ni. Governor chuan Mizo kutchhuak film 25 lai a lut chu lawmawm a tih thu a sawi a, hetiang festival hi Mizoram hmun hrang hrangah pawh buatsaih theih nise a ti a, chu chuan talent nei tha leh Mizo film siamtute a tiphur lehzual dawn a ni, a ti bawk.

Captain Rahul Bali, MISFF Curator chuan sawrkar thlawpna avanga film festival chu hlawhtling a nih tih thu a sawi a. He festival hi Short Film Festival an buatsaih hmasak ber ni mahse, khawvel hmun hrang hrang atang leh Mizo kutchhuak ngei film 25 lo lut chu a beisei phak bak a ni, a ti a. Mizo film siamtute leh chanvo neitute hnenah lawmthu a sawi bawk a ni.

He festival-a film 82 lut te hi Open Category leh Mizo Category ah te then an ni a. A hnuai ami ang hian a titha te hnenah lawmman sem a ni –

1.      Open Category

a.     Anthurium Gold Award for Best Film – Communism (Russian)

b.     Anthurium Silver Award for Best Film – Drainage (Marathi)

c.      Anthurium Bronze Award for Best Film –Dreams (Tamil)

d.     Critic’s Choice Award for Best Film – Forbidden

2.     Mizo Category

a.     Anthurium Gold Award for Best Film – My angel, Albert Zosangliana

b.     Anthurium Silver Award for Best Film – Pasaltha, Lalawmpuia Khiangte

c.      Anthurium Bronze Award for Best Film – Beiseina, Lalramengmawii

- DIPR