Mizoram chhim lam tana MYC hmunpui tur ‘MYC Southern Mizoram Zone’ chu nimin khan Mizoram Youth Commission Chairman Pu Joseph Lalhimpuia’n Lunglei Venglaia SSA Office-ah a hawng.
MYC Chairman chuan MYC Southern Mizoram Zone chu chhimlam mipui, a bikin thalaite tan kawng engkima hmasawnna thlentu a nih ngei a beisei thu leh lehkha zirna leh eizawnna kawng inkawhhmuhna hmunpui tura ruahman a nih thu sawiin, thalai tam zawk ten tumruhna nen hlawhtlinna an hmuh ngei an beisei a ni, a ti.
Thalaite khawvel zauh kawngah theihtawp an chhuah mek zel tih sawiin MYC Chairman chuan chu’ng zingah chuan Central IAS Online Coaching leh SSC Coaching siam a nih thu te, thalaite tana mi entawntlak leh entawn tur thlan chhuah ‘Young Achiever’s Award 2018’ buatsaih a nih thu te, Incentive Cash Award pek chhuah mek zel a nih thu te, Mizo thalaite an inpumkhatna tura hmalakna, Kohhrana thalai pawl hruaitute’n India rama Kohhran hmun pawimawh hrang hrang an tlawh theih nan Exposure Tour programme siam a nih thu te, District tinah Youth Centre changtlung tak buatsaih a nih tur thu te, Mizoram mawina leh hlutna khawvel hmuha pho chhuaha, tourism tihmasawntu a lo nih theih nan thlalatute nen tanghoa hmalak tum a nih thu te a sawi a ni.
MYC Southern Mizoram Zone hnuaiah hian UPSC Online Coaching (ALS), SSC Coaching, IBPS (Banking), NEET leh IIT-JEE Coaching-te ngawrh taka kalpui mek a ni a; thalai 500 chuang zirlai leh sipai tan tumte training leh zirtirna pek an ni.
MYC Southern Mizoram Zone zirlai zinga mi 25-in IBPS prelims exam an paltlang a, MPSC Combined Competitive Exam 2018 prelims-ah mi 5 inziak tlingin UPSC leh SSC zirlaite pawh ngawrh takin an inpuahchah mek zel a ni. -AIR News Aizawl
Post a Comment