NUPA NUN
“Mihring amah chauha awm hi a ṭha lo ve: amah ṭanpui tur a kawppui awm mi ka siamsak teh ang.” Genesis 2:18.
Thuhmahruai
Nupa nun kan sawi dawn a ni a, sawi dan tâwk thiam a har hle mai. Love and Sex tih thupui hmanga lehkhabu lo ziak ve uaih tawh (unpublished) ka nih avangin sawi tur pawh ngah ka inti ve khawp mai. Ril tak leh zau taka sawi theih a ni naa mawl têa sawi ka tum a ni. Tin, kan hotuten he thu sawi tura min tih khan eng china sawi tur nge hriat thiam har ka ti a. Engpawhnise biak in chhûnga sawia tâna mâwi tâwk nia ka hriat ka rawn au chhuahpui ve mai dâwn a ni. Heti chung hian tam tak tân chuan ‘lutuk’ a la ni maithei. Kan inhrethiam a ni ang chu.
1. Eden Huan Aṭanga Intan
Nupa nun hi Pathian remruat, Eden huan aṭanga inṭan a ni. Pathian remruat a nih avang hian a thianghlimin a mawi a, a duhawmin a zahawm em em bawk. Hei vang tak hian zir a phû a, kan zir zel tur pawh a ni.
2. Hmangaihna Hi Hlawh Chhuah Theih A Ni
Hmangaihna hi hlawh chhuah theih a ni a, chuvang chuan a hlû a, a ngaihnawm bawk. Kan awm mai mai hi mi tuin emaw min rawn hmangaih em em se kan tingawt thei lo. Hlawh chhuah a ngâi. Lehkhathiamna te, zaithiamna te, sum leh pâi te, sport theihna tea hlawh chhuah theih a ni a, hetiang lama mi filawr apiangin an hlawh chhuak nasa (an to) ṭhin. Mi tinin engemaw ti kawng talin kan hlawh chhuak vek thei a, nupa nih hnu-ah pawh hlawh chhuak zel tura ṭan lâk thar reng a ṭul thin. Hetianga kan nupui/pasalte hmangaihna hlawh chhuak thar zel tur leh hmangaih zel tlâka ṭan lâk thar reng hi nupui/pasal nei tawhte mawhphurhna a ni.
3. Chawm Len Theih A Ni
Nupui/pasal kan inneih tawh hnu-ah pawh hmangaihna hi kan kawppui te hnen aṭanga hlawh chhuah zel (chawm nun) theih a ni. Ni tur saa ngaih ringawt tur a ni lo; ṭan lâk thar reng ngâi a nia. Chutianga nupa nun châwm nung reng tur chuan a hnuaia mite hi theihnghilh loh a ṭha:
3.1 Sex-ah Lungawi Tur A Ni: Nupa nun hlimna vawrtâwp chu sex-a lungawina vawrtâwp hi a ni. Hetah hian mipain kan tisual nasa; kan hmanhmawh lutuk fo. Tisa châkna siamtu hormon hi mipa leh hmeichhia-ah a inang lo. Mipa chu a inpeih thuai a, a zo thuai bawk a. Hmeichhe châkna erawh chu hmangaihna nen duat taka khalh fê hnu-ah a chhuak chauh a, chutih chhûng chuan mipa chuan lo zovin thildang a lo ngaihtuah daih tawh thei a ni. Hmeichhia chuan hmangaihna leh dawhtheihna nena enkawl (sex hmanpui) an mamawh a. Chumi hre lo mipa chuan a hriat loh hlanin a nupui chu a lo tithinur ṭeuh reng thei a, chu chuan a tithinchhe riau thei. Chumi awmzia chu mipa hi chêt zung zung loh tur tihna a ni. Kan nupuite inpeih hun nghah hram hram a, an dinhmuna zira chêt nise.
A tua mah mah hi intih dâwn loh tur a ni (I Kor 7:5). Tin, inpawl zawha kan hormon chhuak hi a inang lo leh pek bawk. Mipa chuan a zawh rualin thildang a ngaihtuah nghal daih loh leh a mut a chhuak ngawih ngawih a. Chutihlaiin hmeichhia erawh chuan hmangaih taka kuah leh duat a lo mamawh ngawih ngawih si a ni.
Tin, sex hi khum-laizawlah hun bi nei thlapa hman kher emaw, uluk em ema hman kher emaw tur a ni lo. Miin kan thawm an hriat loh a, min hmuh dawn loh phawt chuan hmun tinah tih zâwk tur a ni. Hei hian a tihlimawm hranpa ve reng reng bâkah thil danglam tawnga inhriat avanga hlimna mi a pe thei. Quicky Sex-te pawh hi neih fo a ṭha.
3.2 Kan Nupui/Pasalte Tan Itawm Tur: Nu/pa ka ni alawm tia inthlahdahho hian an tisual châwk. A bikin hmeichhiain an tisual tam zâwk maithei. Nilenga nula nalh tak tak hmu thin mipa chuan in lama a nupui ṭawp hnuang chu zawi zawiin a sit tial tial thei. Chuvangin nu nih hnu-ah pawh ler rawngkai ni si lo, a mawi tawka inchei a, intuaihnum a, pasalte tan itawm taka awm hi hmeichhe mawhphurhna a ni. Chumi rual chuan mipate pawh nupuite tana zahpuiawm lo taka smart ve tum ila. Chu chu nupa nuna thil pawimawh em em a ni.
3.3 Rimtui Tur: Kolkota court pakhata nupa inṭhen za zela 20 te chuan an kawppuite an ṭhen duh chhan chu an rimchhiat vang a ni an ti. Hmeichhe rimtui chêk mai chu mipa tân tawrh har tak an ni. Rimtui hian hmangaihna a ko va, rimchhia erawh chuan a hnawt bo thei. Chuvangin nu chuan a pasal vang tal pawhin powder, lipstick leh hnawih-rimtuite hi ringtute tiha tana mawi tawk siin ching ve sela. A rim a tihtui chêk reng phawt chuan a pasal tân a ngaihawm lehzual ang.
Nute hian inbual fai ngun a, pasalte tana ngaihawm hliah hliaha awm chu in pasalte laka in duty-ah ngâi rawh u. In taksa kumkâr zawng zawng tifaiin in hâte pawh nâwt uluk ula. Pasalte bulah rimchhe deuha mut loh tur a ni.
Tin, pa pawhin kan taksa hi vawng fâi ila. Inbûal taimâ ang u. Nupuite tân bula mut hrehawm khawpa thlan rim nam vung vunga mut te hi chin loh a ṭha. “Rimtui” hian hmangaihna a chawm lian a, rimchhia erawh chuan inngaihzawnnate pawh a hnawt ṭiau thei a nia. Kan ka chhûngte hi vawng fai ila. Kan bula mu hnâi ber kan nupuiten kan bula mut nuam an tih phawt chuan nupa nun a nuam lo thei lo va, chu chuan a ṭha zâwngin chhungkaw nun a nghawng thui hle thei a ni.
3.4 Thutak Ngun Reng Loh: Nupa hi thutak hlira inkawm loh tur. Infiam a, nuih dun fo tur. Fate hriata nuih dun phei chu an tân rimawi a ni. Lehkhabu hlimawm lamte hi chhiar dun ila. Pindana kan nui ri chu pindan lehlama kan fate tân a âia rimawi dang a awm lo.
3.5 A Fâla Awm Dun Fo Tur: Aizawlah hian han hawi khaw thawnna tur hmun a vang hle mai. Mahse ATC kawt atang khian kut insuiha inngheng rialin Aizawl khawpui hi han thlir dun ila. A nih loh leh Beraw tlâng thengthaw nuam lâiahte sawn inngheng riala ṭhu dunin kut han inhmer sak vawng vawng mai ila, ina awm reng ringawt âi chuan hmangaihna a tithar sawtin khawvel hi a tinuam sawt lo vang maw? Hetiang hun hi insiam fo ila, tichuan kan inngaihzawn laia kan inhmangaihna leh inthlâkhlelhna nun kha a kohkir leh theih a ni.
3.6 |hatna Lâi Insawisak: Hmangaih ngawih ngawih chunga kan neih kan nupui/pasalte hian fak an phû a, fak fo tur an ni. I nupui/pasal felna lai nia i hriat pahnih/pathum chu ziak la, a lukham hnuaiah emaw, a bag chhûngah emaw dah teh; a chhiar hun chuan a thinur lo viau ang.
4. Fel Lutuk Loh
Fel loh hi a ni law’m ni kan hlauh? Mahse kan kawppuite bula fel tum lutuk emaw, fel lutuk emaw hian nupa nun a tibuai thei zâwk lo maw? Mahni nihna diktak nen inthup miah lovin kan kawppuite hi nei ila, chu chuan inhriatthiamna thûk zâwkah min hruai thlengin a rinawm. Tin, mi famkim lo, ngaihdam ngâi ve ve kan ni tih inhriat chian tawnna nena nupa inen hian inngaihdam a nuamin hmangaihna pawh a thûk lehzual a ni. Chutiang ni lova, kan duh dan ang vek leh sawisel bova awm tura kan inbeisei chuan inhauhna leh insawiselna hlirin nupa nun hi a hman theih a ni. Hemi ina a tum pakhat chu inngaihtlâwmna a ni ber. Nupa kârah inngaihtlâwmna dik tak a awm phawt chuan minute nga chhungin buaina za zela sawmkua chu a reh nghal ang.
5. Chhungte Nena Kan Inkâr:
Mizote hi chhûngte nena inchiahpiah tak hnam kan nih avangin chhûngte hi sawi tel loh theih loh an ni. Keima mimal ngaihdan ni reng ṭhin chu nupui/pasal neih tawh hnua kan nupa kâra chhûngte inrawlhtir loh hi a ni. Ka nu leh pa emaw, ka farnute emaw chu kan nupa kâra inrawlh a, ngaihdan lo sawi ve sek turin ka duh lo va, chutiang bawkin ka nupui chu a unauteho nupa kâra lo inrawlh ve sek a, ngaihdan lo sawi ve sek turin ka phal hek lo. Thenkhat chu mi nupa kâra refree emaw inti niawm takin an lo phi ve chung ṭhin. Hetah hian hmeichhiate hi vên ngâi an ni fo. Mipain kan nupuite hi vên thiam tur a ni. Pasal nei tawh i nih chuan in in lamah lawr chhen lo la, buaina tam tak chu pumpelh a ni ang.
6. A Taka Tih Tur: He lehkha phêk kan rawn semah hian i nupui/pasal ṭhatna lâi nia i hriat chu ziak chhuak la, i pe nghal lo a nih pawhin nakina a la hmuh turin a lukham hnuaiah emaw, a iptê-ah emaw dah rawh.
Sawi Ho Tur:
1. Nupa nuna sex pawimawhna hi kan la sawi uar tâwk lo em? Eng tin nge nupa nun a nghawng?
2. Nupa nun hlimna atana ṭha i tih zawng han sawi teh.
3. Kan nupa kâr ṭheuhah kan chhûngte chu eng chena inrawlh turin nge kan duh?
Source: Rauthlaleng
Post a Comment