Michael Lalmanzuala


thuziakTukin zet chu Vanapa Hall thlen hma deuh aṭangin, kê-a kal harsa khawpiin TRAFFIC PUBLIC jam a lo awm mup mup mai a. Khaw hrang hranga vote thlak tura kal tum leh an chuanna tur bus lo ding ṭhup vang kha a lo ni a. Treasury Square thlengin an jam phei a ni. Ka haw lam pawhin New Life Hospital hlui kawt thlengin motor an la intlar a ni.

Kan hriat ve dan chuan vote thlak tura lirtheia inphurh hi Election Model Code of Conduct phal loh a ni a. A rûk pawh ni lova, khati taka ualâua an inphur khan ngaihtuahna a tikal thui ta deuh a ni. Anmahni dan siam ngei bawhchhe mawlh mawlh mai, Election Commission-ina Tripura Camp aṭanga Tuikuk voter phurh an remtih leh lawi si te hian mi dangte pawh a tingampa a ni ang e.

Ngaihtuahna-ah chuan MPF an lo lang hmasa ber a. Khatiang thil thleng te kha an hre lo em ni ang, ti dawn ila, inthlan dawn apianga an tih dan a ni a, anni dan bawhchhiat loh nana hmalatu chuan hriat awm tak chu a ni si a. An thil tih danah hian duhtâwk chin hi an nei hma deuh emaw ni te ka ti hial ṭhin a ni.

Joint Platform te tehrêng pawh hi eng nge maw a á¹­angkaina ber le? Ka en ve chhun East II platform-ah khan candidate pakhat chuan corruption hi kan ram leh hnam tichhetu kan do tur lian ber a ni, tih thu a sawi a. A hnu-a candidate dang khan rawn chhangin ‘corruption chungchang sawi lo ber turin a rawn sawi’ a ti a. Khatiang thu rawn sawitu khan chhanna hun a neih lehah pawh a rawn chhang chuang si lo va. MPF hotu lam ten ‘ruling’ an rawn nei chuang bawk si lo va, kha thu pawimawh tak kha sawi loh tawp angin a zûzî ta tawp mai a ni.

2008 Durtlang Jt. Platform-ah khan candidate dang pathumte kha sawrkarna lo chelh vek tawhte, kan ti ang an tih ti leh si lo, dawtsawi hmang an ni a, tuna kan ti ang an rawn tih leh te pawh hi Durtlang mipuite hian in ring ngam dawn em ni? ka ti a. Tu man min chhang lo va’ MPF hotuten ‘ruling’ an pe bawk lo va. Kei chuan thudik ka sawi kha nemnghehna-ah ka ngai a. Durtlang mipuite erawh chuan dawtsawi chîng ka tih zinga mi pakhat kha lungawi takin an thlang ta mai si a ni.

House to house campaign an khap á¹­hin chu tun á¹­umah hian an tel venain an phal ta thung a. Kan ina candidate pakhat lo kal chu in chung aá¹­anga ka zu chhuk chuan amah chauhin ‘sitting room’-ah a lo awm a. Mi dangte chu pâwnah an awm thung a. Minute 5 vel a thusawi ka ngaihthlak chhung khan tumah an lo lût lo. Cheng nuaih khat te emaw min pe ta se, tuman an hre lo vang.

Minute 5 chhung candidate te nena in an fan den den hunah hi chuan MCC kalh zawng chuan tuman thil an ti lo vang tih chu a chiang sa mai a. Khatianga an hun hman pawnlamah khan candidate te chuan an puanhnuai thil tihna hun chu an ngah em em a. Lalrinliana Sailo chuan an party hruaitute chu ruling party mite sum sem vêng rêng rêngin an hmanhlel a, an inûm reng mai niin a sawi a ni. East I ZPM te phei chuan hetiang thil vêng tura Flying Squad te hial an din thu chanchinbu-ah kan hmu a ni?

Hetiang hun pawimawh zawk leh hlauhawm zawkah hian MPF lam mite hmuh tur an awm lo ni awm tak a ni. Chuti a nih chuan eng chiah chu nge an ṭangkaina? Office leh sumdawnna lama corrupt tak takte pawh biak in inkhawm an ṭhulh ngai loh chuan mi ṭha-a kan ngai ngawt ang hian Jt. Platform an neih hi ti ṭha tâwkah an inngai em ni? Chu chu a ṭha tâwk si lo.

MPF te thil tih dan hi a ler lama ti ang an ni a, a fuh lo a ni. Sual tura thlemnaa lût lo tur chuan kan rilru leh kan thinlung kan tichak tur a ni a. Chu chu vanrama kal tura kan inbuatsaih nana pawimawh ber a ni. Chu chu kan Kohhran hruaituten min buatsaih dan tur leh min kaihhruai dan tur dik tak chu a ni. Chu chu kan Kohhran hruaitute hna pawimawh ber a nih laiin zai ṭhup ṭhup, lam mup mup, inkhawmpui châmchî, camping leh ngawt ṭhin kalphung min neih nghehpui a. Chu chuan kan thinlung chhungrila Pathian thuawihah min siam si lo va. Hmuh theiha kan lan dan pawnlang tak hi kan duhtawk a, a pawi a ni. Ringtu kan nihnaah chakna kan nei lo va. Thlêmtu apiangin min zuam em em a, keinin hlauh enin kan lo en bawk si. BJP-in min zuam dan te hi a chiang lehzual ta a nih hi. Min thlêm ngai miah lo Yoga te chenin kan hlau a ni.

MPF te thiltih á¹­hat langsar tak chu party-ten thingpui inna hmun an siam tih tâwp hi a ni a. Thingpui no khata thlêm thlûk theih ringtu neih duah mai te hi Kohhran hruaitute tan chuan a tlâwmthlak hle a ni lo’m ni?

Tichuan kan tih tur dik tak chu Mihring duhzawng leh lawmzawng mai lova, Pathian duhzawng zawka a rawngbawl hi a ni e. Rev Saiaithanga leh Rev Thansiama te ‘chanchin á¹­ha’ kha kan zir a, kan zawm a ngai a ni.

Post a Comment

Powered by Blogger.