- Lalnunṭawma Fanai

Vanglaini EditorVawiin chu nilengin lei laiin hna ka thawk a, Ina ka haw, facebook ka en chu Pu K Sapdanga, Vanglaini Chanchibu Editor chu MLA Election 2018 neihna tura affidavit a thehluh aṭanga a hausak dan tarlanna an post ka hmu a. Pu Sapa chanchin hi ṭhangthar leh zel ten an hriat atan tiin harsatna sual chhuaktu mi hlawhtling mi 9 chanchin, ka lehkhabu siam ve awmchhun "Thangchhuah Tlâng" kum 2011 a kan tlangzarhah ka lo ziah tel tawh avangin a hausakna thu an ziah hi ka ngaihven zual hle mai a. Tlem azawng han tarlan ve mai mai ṭhain ka hria a, inthlahrung taka han thai ve ka duh a ni.

Pu Sapa hi Vanglaini neitu leh ZONET neitute zing a mi a ni tih kan hre ṭheuh a. Harsatna tam tak paltlanga Vanglaini chanchinbu hmanga bul a ṭan dan leh neih nei sa bik miah loa loan te la a, bianga thlan tui luang a, ṭahna mitttui leh thawhrimna leh Pathian tihna tak tak nena hlawhtling thei a ni tih hi sawi thar ka châk a, hei hi ṭhangthar zelte hian kan entawn fo tur niin ka hria a, mihring kan nunhonaah pawh number one a kan dah reng tur niin ka hria. Vanglaini chanchinbu siama bul a ṭan laia harsatna an tawh zinga ṭhenkhat chauh, ka lehkhabua ka lo ziah tawh hi lo thur chhuak hmasa ila,


"An khawl thar chu Quintal 40 laia rit a ni a, ṭhenawm khawveng ten an phurpui a, hnatlangin an thawk hial. A ke lam zuih, a lu lam rit bur si hi a ni a. An kar tawlh hrut hrut a, vawi leh khatah a bûk ta thut mai a, 17% interest chawia loan cheng nuai 30 laa an lei khawl chu chhuat charah a lu sawh zawngin a tlu ta rup mai a, a ngaihtuahna chu a vak kual thui lutuk. Apex Bank Board officials, nuai 30 leh a pung, a chhe hlen ang em? zawhna hlir chuan lang thei leh lang thei lo a luah khat a ni ber. Bang kilah aw rawl chhuah meuhin chhungpui nu a lo ṭap rawih rawih a, hetih hunlai hian Vanglaini Chanchinbu meuh pawh a tar bawih bawih a ni ber! " tiin.

Heng bâkah hian, "Zan dar 2-ah te an mu a, zing dar 4 ah chanchinbu semte’n bell hmetin an kai tho leh ṭhin" tih te, "...Thla ruk chhung vel chu paper man daih pawh chanchinbu man an dawng lo. Chutihlaiin loan rul tura hriattirna lam, thu dengkhawng tak tak an dawng reng bawk si a, a melh ngai a melh ngawih ngawih fo mai"


"Inti editor ve si, lehkhabu zakzeha hawi kual ve ṭhin kha khawl nawr virtuah a ṭang leh lawp lawp a. Tawnzau pawh hak peih awm lo khawpa a lum zanah phei chuan khawl nawrna lamah thlan tui a luang nasa thei hle. Zanlaiah meizuk chawlhte an nei a, thawkrimte hlimna khawvel a nih miau avangin thlan tla khawpa a thawhna chuan hlim ruk veng vengna a siam hlauh ṭhin" titein ka ziak a ni.

Phek dang lehah chuan, "Kum 2001 January ni 21-ah chuan Statement tiata Vanglaini chhu turin ruahmanna an siam a. Computer pawh tlaivarin a zir leh phah hial. Aizawlah internet a lar ṭan a, Information office leh PTI office in teleprinter hmanga news an chhutsa chu a pawt thla a, tlaiah a letling leh a, TV news hmangin a update leh ṭhin. A tuk atana inbuatsaihna hun zan khat chiah a neih chang chuan a rilru buai ṭhin hle. A naute a thlah kual meuh chuan zing exer late nen an intawk ṭhin. An kun deuh lap pawhin a nupuiin a vil reng a, a mutsan ngai lo. Zanah a naute a thlah kual a, hah rimtawng lutuk vanga muthlu titiha motor khalh chang a nei a, a mi thlah turte In tlan pelh chang pawh a nei ṭhin," tihte pawh a chuang a ni.

Heng hi Pu Sapa bul ṭan dan a ni a, amah hre chiangtu leh a bul tan laia a dinhmun harsatzia hre chiangtu mi zahawm leh pa fel tak takte pawhin a tumruhna an lo fak ṭhin a ni. MLA Candidate a nih avanga a hausakna kan hriat rual hian, hausa tura a zinkawng hautakzia leh hrehawm tam tak a tawrh dan hi hriatpui hmasa phawt ang u hmiang. Mi hi an hausak avang hian an dik lo vek tihna a ni hauh lo. An hausakna chhan zawk hi kan chhui tur a ni. An dik lo a nih chuan chu chu kan sawiselin kan bei mai zawk tur a ni ang. Pu Sapa hian hausak phuin hna a thawkrimin ka hria. Vawiin thleng hian, kum upa lam pawl lek lek a ni chung hian; a hnuaia kum 7 dawn (Zonet & Vanglaini) ka thawh chhung hian, zingkara han biak a ngaih chang pawhin, hnathawka a buai laite a lo ni zing hle tih ka hria a. A bulah pawh, "Hahdam deuh leh nuam deuhin awm tum ve tawh teh, i upa ve dawn ta a. I fate an fel a, an awl thei tawh chein ka hria," te hi ka ti ve bawrh bawrh ṭhin.

Pu Sapa hian mi a hau ngai meuh lo a, kei phei chu tlin lohna ka neih tam nen; min la hau lo a, zahawm tak leh nem tak, fiah siin thil min sawipui ṭhin. A bula thil sawi a ṭul chang pawhin uluk takin kan sawi lai a ngaithla a, a lo inrawlh ngai miah lo! Kan vei zawng leh duh zawng kan sawi zo a, a ngaihdante min sawipui zui a, a bula thil thlen aia nuam hi ka la tawng miah lo! ZONET a ka thawhnaah hian, hna thil bika a ṭawngkam khat ka hriat reng chu, "Media hna hi a hautak a, a hmunah i kal chilh zel dawn nia," tih hi a ni. Hei hi ka hre ta reng a, a theih chin chinah zawm ka tum thin. A hnuaia ka thawh hmaa a chanchin ziaktu ka nih avangin a kawng sah kuaksaah ka kal ve a ni tih hi ka inpawm dan a ni.

Mihring hi tumah kan famkim thei lo tih hretu hlir kan ni a, Pu Sapa pawh hian fel lohna leh tlin lohna pawh a nei ve ngeiin ka ring a, sawi tur erawh ka hre lo viau mai! Mahse, mi hausa a nihna hrim hrim kan ngaimawh lek lek dawn a nih chuan, a hausak chhan, tawrhna, ṭahna, rilru hahna, beidawn duh lohna hmanga a hlawhchhuah a ni tih hi pawmsak ila. Kan fate, kan naute, kan mi duhsak zawngte fuih nan leh an entawn atan pawh tarlang ngam zawk ila, chu chu a phu hle pawhin ka hria. 

(Keima'n ka hmuh dan ziak ka nih avangin 'ka' tih hman fo a ngai a, min hriatthiam ka beisei).

Post a comment

Powered by Blogger.